Avropa Komissiyası Venesiya Biennalesi çərçivəsində Rusiya pavilyonunun yenidən açılması qərarına sərt reaksiya verərək, quruma ayrılan təxminən 2 milyon avroluq maliyyəni dondura biləcəyini açıqlayıb.
"Euronews" xəbər verir ki, qərar, Rusiyanın 2026-cı il sərgisində iştirakının Ukraynanın işğalı ilə bağlı tətbiq olunan sanksiyalara zidd olduğu iddiaları fonunda qəbul edilib.
Avropa Komissiyası Biennale rəhbərliyindən mövqeyini 30 gün ərzində dəqiqləşdirməyi tələb edib, əks halda 2028-ci ilə qədər planlaşdırılan maliyyənin ləğvi gündəmə gələ bilər.
Məsələ Corciya Meloni hökuməti daxilində də fikir ayrılıqlarını dərinləşdirib; baş nazirin müavini Matteo Salvini Brüsselin addımını “şantaj” adlandıraraq sərt tənqid edib.
Digər tərəfdən, Ukrayna və 22 Aİ ölkəsi Rusiyanın iştirakına qarşı çıxaraq pavilyonun açılmasını protesto edib.
Volodimir Zelenski isə Biennale ilə əlaqəli bir neçə rus mədəniyyət nümayəndəsinə qarşı sanksiyalar tətbiq edib.
Müzakirələr fonunda bəzi siyasətçilər sənətin siyasi qarşıdurmalar zamanı dialoq və körpü rolunu oynamalı olduğunu vurğulayır.
Digərləri isə Avropa Komissiyasını “ikili standartlar” tətbiq etməkdə ittiham edir.
Beləliklə, Venesiya Biennalesi ətrafında yaranan böhran Avropa mədəniyyət siyasətində ciddi gərginlik və fikir ayrılıqlarını üzə çıxarıb.
