"Football-plus.az" xəbər verir ki, 35 yaşlı oyunçunun sonuncu klubu ötən ilin sonunda ayrıldığı Meksika “Pumas”ı olub. Uelsli 2024-cü ilin sentyabrından bəri milli komandada çıxış etməyib, ona daimi zədələr mane olub.
“Sizi təmsil etmək mənim üçün şərəf idi”
Aaron builki dünya çempionatına qədər yığmaya dönəcəyinə ümid edirdi. Komanda final mərhələsinə vəsiqə qazanacağı təqdirdə yığmada oynayacağına söz vermişdi. Ancaq belə olmadı: Uels pley-offun yarımfinalında Kardiffdə Bosniya və Hersoqovinaya uduzmaqla (1:1, p. – 2:4) DÇ-yə qatılmaq şansını itirdi. Və Remzi belə qərar verdi ki, artıq vidalaşmaq zamanıdı:
“Bu asan qərar deyil. Uzun-uzadə düşüncələrdən sonra futbolçu karyeramı bitirməyə qərar verdim. Uels yığmasından başlamaq istəyirəm: bu ölkənin futbolkasını daşımaq, həmin formada çoxlu qeyri-adi an yaşamaq mənim üçün böyük şərəf idi. Rəhbərliyi altında oynadığım bütün məşqçilərin, mənə bütün məsələlərdə yardım edən personalın böyük töhfəsi olmasaydı, bu mümkün olmazdı”.
Aaron həmçinin milli komandanın əsas fanat qrupu olan “Qırmızı divar”a xüsusi minnətdarlıq edib:
“Həm pis, həm də sevincli günümdə yanımda olubsuz. Bütün eniş-yoxuşlardan keçmisiz, uğurlarımızın vacib hissəsinə çevrilibsiz. Sizi təmsil etmək mənim üçün şərəf idi. Sağ olun”.
Futbolçu indiyə qədər formasını geydiyi bütün klubları yada salıb, eləcə də xanımına və uşaqlarına təşəkkür edib:
“Yanımda olmasaydız, bütün bunlara nail olmaq mümkünsüz idi”.
Aaronun karyerası
Remzi peşəkar karyerasına “Kardiff Siti”nin akademiyasında başlayıb və 2008-ci ildə əsas komandada debüt edib. Onun meydanın mərkəzindəki inamlı oyunu top-klubların diqqətini cəlb edib, xavbek tezliklə “Arsenal”la müqavilə bağlayıb. Remzi ən yaxşı illərini məhz Londonda keçirib, Arsen Vengerin sisteminin ən vacib oyunçularından biri olub. Uelskinin yolu heç də həmişə hamar olmayıb: iki dəfə icarəyə göndərilib – “Nottingem Forest”ə və doğma “Kardiff”ə. 2010-cu ildə isə ağır zədə alıb. “Stok Siti”nin müdafiəçisi Rayan Şoukross ilə toqquşmada ayağı iki yerdən sınıb, bu üzdən bir ili boşa verib. Buna baxmayaraq, yaşıl meydana qayıdıb və İngiltərə kubokunun iki finalının qəhrəmanı olub: onun qolları 2014-cü və 2017-ci illərdə “Arsenal”a titul qazandırıb. Həmçinin 2015-ci ildə bu turniri qazanıb, üstəlik üç dəfə ölkə Superkubolunun qalibi olub.
Remzi 2019-cu ildə azad agent kimi “Yuventus”a keçib. Turində İtaliya çempionu olub, bu ölkənin kubokunu və Superkubokunu qazanıb, ancaq zədələr üzündən əsas heyətdə möhkəmlənə bilmədiyinə görə icarə əsasında doğma “Kardiff”ə qayıdıb. Sonra xavbek “Nitsa”nın formasını geyib, 2023-cü ildə yenidən “Kardiff”də görünüb, amma bu dəfə daimi əsasda. Sağlamlıq durumundakı problemlər üzündən, demək olar ki, oynamayıb, əvəzində 2024/25 mövsümünün sonunda, Ömər Rizanın istefasından sonra çempionşipin son üç oyununda baş məşqçinin səlahiyyətlərini yerinə yetirib. Komandanın çempionşipdə yerini qorumaq şansı olsa da, 3 oyunda qazanılan iki xal buna imkan verməyib.
Aaron 2025-ci ildə futbol karyerasını Meksikada davam etdirib, “Pumas”la müqavilə bağlayıb. Bu mərhələ uğursuz olub: uelsli cəmi 6 oyun keçirəndən sonra yenidən zədə alıb, həmçinin şəxsi faciə yaşayıb – itini itirib. Müəyyən mükafat elan olunmasına baxmayaraq, it tapılmayıb ki tapılmayıb. Mediada yazılanlara inansaq, bu itki futbolçunun psixoloji durumuna ciddi təsir göstərib və müqavilənin pozulmasının səbəblərindən biri olub.
Remzi Uels yığmasınd a 86 oyun keçirib və 21 qol vurub. O, oyun və qol sayına görə yığma tarixinin liderlərindən biridi.
“Remzi lənəti”
Aaron azarkeşlərin yadında təkcə “Arsenal”la “Yuvenus”un heyətindəki oyunlarına görə yox, həm də futbola dəxli olmayan bir səbəbdən qalıb. Ən qeyri-adi konspiroloji nəzəriyyələrdən biri məhz onun adı ilə bağlıdı. Yarımmüdafiəçi nadir hallarda qol vurub. Ancaq o hər dəfə fərqlənəndə ...məşhurlardan kimsə dünyasını dəyişib. Blogerlər və media bu üst-üstə düşməni “Remzi lənəti” adlandırıb.
Ölənlərin siyahısı yetərincə genişdi. Baxın, Aaronun qol vurduğu günün ertəsi və ya iki-gün ərzində siyasətçi Müəmmər Qəddafi, müğənni Uitni Hyuston, “Apple” şirkətinin yaradıcısı Stiv Cobs, “Forsaj”ın ulduzu Pol Uoker və aktyor Robin Uilyams dünyasını dəyişib. Və bütün bu ölümlər onun “topçular”ın şərəfini qoruduğu illərdən yalnız 2011-13 aralığını əhatə edir. Əslində siyahı çox zəngindi.
