ain.az bildirir, Marja.az saytına əsaslanaraq.
ABŞ Prezidenti Donald Tramp ABŞ-İsrail ilə İran arasında müharibə ilə bağlı “Düşünürəm ki, bitməyə çox yaxındır. Yəni, vəziyyəti bitməyə çox yaxın görürəm” deyib.
Marja xəbər verir ki, Tramp "Fox News"a verdiyi müsahibəsində ABŞ-ın İrana qarşı hücumlarını və sülh danışıqları ilə bağlı prosesin gedişatını qiymətləndirib.
İranla müharibə məsələsində davamlı olaraq keçmiş zaman ifadələrindən istifadə edən Trampdan müharibənin həqiqətən bitib-bitmədiyi soruşulduqda, “Düşünürəm ki, bitməyə çox yaxındır. Yəni, vəziyyəti bitməyə çox yaxın görürəm” ifadələrini işlədib.
Tramp, “Bilirsiniz, əgər mən indi oradan tamamilə çəkilib getsəm, o ölkəni yenidən ayağa qaldırmaları 20 il çəkər. Hələ işimiz bitməyib, nələrin olacağını görəcəyik. Düşünürəm ki, onlar səmimi şəkildə bir razılaşma əldə etmək istəyirlər” deyib.
ABŞ ordusunun İrana qarşı hücum qərarını dəyərləndirən Tramp, hücum qərarı verməsəydi, hazırda nüvə silahına sahib bir İranla üz-üzə qalacaqlarını iddia edib.
Qeyd edək ki, ABŞ Prezidenti Tramp İran ilə ikinci tur danışıqların “qarşıdakı iki gün ərzində baş tuta biləcəyini” bildirmişdir.
XXX
ABŞ vitse-prezidenti JD Vens (JD Vance) də bildirib ki, Prezident Donald Tramp İranla məhdud deyil, əksinə ətraflı bir razılaşma əldə etmək istəyir və bunun üçün danışıqları davam etdirəcəklər.
Vens deyib: “Prezident böyük bir razılaşma əldə etmək istəyir. İran üçün əsasən təklif etdiyi şey çox sadədir. Əgər siz normal bir ölkə kimi davranmağa hazırsınızsa, biz də sizə iqtisadi baxımdan normal bir ölkə kimi davranmağa hazırıq. O, məhdud bir razılaşma istəmir.”
Vens qeyd edib ki, sözügedən müvəqqəti atəşkəs hələ də davam edir və bu səbəbdən proses hələ də davam etməkdədir.
Potensial razılaşma ilə bağlı hələ də nikbindir
“İranla razılaşmanın hələ tamamlanmamasının səbəbi prezidentin İranın nüvə silahına sahib olmadığı bir razılaşma istəməsidir”,- deyən Vens, danışıqların davam edəcəyini və potensial razılaşma ilə bağlı hələ də nikbin olduğunu bildirib.
Vens, “Danışıqları davam etdirəcəyik və bunu reallaşdırmaq üçün çalışacağıq, çünki bu dünya üçün çox yaxşı olar. Ölkəmiz üçün və hamı üçün əla olar. Buna görə də bunu həyata keçirmək üçün mübarizə aparmağa davam edəcəyəm” ifadələrini işlədib.
İki ölkə arasında ciddi etimadsızlıq olduğunu da vurğulayan Vens deyib: “Bu problemi bir gecədə həll edə bilməzsiniz. Qarşımızda oturanların da bir razılaşma əldə etmək istədiyini düşünürəm və bilirəm ki, ABŞ prezidenti bizə ora gedib yaxşı niyyətlə danışıqlar aparmağımızı tapşırıb. Biz də bunu etdik. Etməyə də davam edəcəyik.”
Sonrakı hadisələr barədə daha çox məlumat almaq üçün ain.az saytını izləyin.
