ABŞ administrasiyasının rəhbəri Donald Tramp Böyük Britaniyanın hazırkı hakimiyyəti ilə münasibətləri tənqid edərək, Londonla ticarət sazişinin şərtlərinə yenidən baxılacağı ilə hədələyib.
Xalqcebhesi.az -ın xəbərinə görə, Amerika lideri bildirib: "Bu elə bir münasibətdir ki, biz onlardan kömək istəyəndə gəlmədilər, ehtiyacımız olanda gəlmədilər, hətta ehtiyacımız olmayanda da gəlmədilər. Və onlar hələ də gəlməyiblər."
Müxbir ondan "xüsusi münasibətləri" təsvir etməyi xahiş etdikdə, Tramp söhbətin məhz kimdən getdiyini dəqiqləşdirməli olub.
Tramp hədələyici tonda əlavə edib:
"Bu, kədərlidir. Biz onlara yaxşı ticarət sazişi verdik, hətta lazım olduğundan daha yaxşısını, lakin bunu hər zaman dəyişmək olar."
Bununla belə, o, aprelin sonunda ABŞ-a dövlət səfəri edəcəyi gözlənilən Böyük Britaniya Kralı III Çarlz haqqında çox xoş sözlər deyib:
"O, böyük centlmendir, mənim dostumdur. Fantastik insandır. Onu çoxdandır tanıyıram. Möhtəşəm şəxsiyyətdir."
Məryəm Quliyeva
