Demokrat.az portalından verilən məlumata görə, ain.az xəbər yayır.
Ötən gecə Bakıda müşahidə olunan qəfil və intensiv dolu yağıntısı şəhər ərazisində ciddi müəyyən fəsadlara səbəb olub. Qısa müddətdə güclənən yağıntı xüsusilə açıq havada saxlanılan avtomobillərə zərər vuraraq bir çox nəqliyyat vasitəsində müxtəlif dərəcəli batıq və şüşə zədələnmələri ilə nəticələnib. Məsələ ilə bağlı nəqliyyat eksperti Aslan Əsədov Demokrat.az-a bildirib ki, bu tip hadisələr, yəni dolu, güclü külək və digər qəfil ekstremal hava şəraiti avtomobillərə ciddi fiziki ziyan vura bilən təbiət hadisələri sırasındadır:“Ən çox rast gəlinən ziyanlar kuzovda çuxurların yaranması, şüşələrin çatlaması və ya qırılması, güzgülərin zədələnməsi və boya örtüyünün korlanmasıdır. Bəzi hallarda isə güclü dolu avtomobilin kapotuna, damına və baqaj hissəsinə daha ciddi struktur ziyanlar yetirə bilər. Külək zamanı uçan əşyalar avtomobilə çırpılaraq əlavə zərər riskini artırır. Ağac budaqlarının qırılması və ya reklam lövhələrinin aşması da təhlükə mənbələrindəndir. Bu kimi hallarda zərərin miqyası hadisənin qısa müddətdə və intensiv baş verməsindən asılı olaraq daha da böyüyə bilər. Belə risklərdən qorunmaq üçün ilk növbədə avtomobilin saxlanma yeri çox önəmlidir. Mümkün olduqda avtomobillər yeraltı qarajlarda və ya örtülü dayanacaqlarda saxlanılmalıdır. Açıq sahələrdə park etməli olduqda isə ağacların, elektrik dirəklərinin və köhnə konstruksiyaların altından uzaq durmaq vacibdir. Hava proqnozlarının mütəmadi izlənməsi də riskin azaldılmasında mühüm rol oynayır”. O qeyd edib ki, xüsusilə dolu xəbərdarlığı verilən günlərdə avtomobilin daha təhlükəsiz əraziyə köçürülməsi tövsiyə olunur:“Əgər bu mümkün deyilsə, avtomobilin üzərinə xüsusi qoruyucu örtüklər çəkilməsi müəyyən qədər müdafiə təmin edə bilər. Qoruyucu örtük olmadıqda belə, qalın parça və ya örtük materiallarından istifadə zərəri qismən azalda bilər. Şəhər şəraitində sürücülərin diqqətli olması da vacibdir. Park yerlərinin seçimi təsadüfi olmamalı, daha çox sığınacaq rolunu oynayan binaların yaxınlığı üstün tutulmalıdır. Eyni zamanda, güclü külək zamanı açıq məkanlarda uzun müddət avtomobil saxlamaq risklidir. Dolu başlayarsa, mümkün olduqda avtomobili dərhal təhlükəsiz yerə aparmaq və ya örtmək ən düzgün addımdır. Bu cür hadisələr zamanı sürətli qərar vermək ziyanın miqyasını əhəmiyyətli dərəcədə azalda bilər. Ümumilikdə, əsas məqsəd avtomobili açıq və riskli zonalardan mümkün qədər uzaq saxlamaq və hava şəraitinə uyğun davranmaqdır”.Leyla Turan
Demokrat.az
Sonrakı hadisələr barədə daha çox məlumat almaq üçün ain.az saytını izləyin.
