Yaponiyanın avtomobil nəhəngi Nissan Motor Böyük Britaniyadakı istehsal gücünü artırmaq məqsədilə Çinin avtomobil istehsalçısı Chery ilə əməkdaşlıq imkanını qiymətləndirir.
FED.az biznes və maliyyə xəbərləri portalı xəbər verir ki, Financial Times qəzetinin xəbərinə görə, tərəflər Böyük Britaniyanın Sunderland şəhərində yerləşən zavodda birgə istehsal məsələsi üzrə danışıqlar aparıblar.
Sunderland zavodu yarı güclə işləyir
Məlumata görə, Nissan Motor-ın Böyük Britaniyadakı Sunderland zavodu hazırda təxminən 50 % istehsal gücü ilə fəaliyyət göstərir. Bu səbəbdən şirkətin zavodda istehsalı artırmaq üçün yeni tərəfdaş axtardığı bildirilir.
Danışıqlara yaxın dörd mənbəyə əsasən, Chery ilə aparılan danışıqların əsas məqsədi zavodun istifadə səviyyəsini artırmaqdır.
Daha əvvəl Cənubi Afrikada satış baş vermişdi
Digər tərəfdən, Nissan Motor ilin əvvəlində Rosslyn şəhərində yerləşən istehsal aktivlərini Chery şirkətinin yerli bölməsinə təhvil vermişdir. Bu addım iki şirkət arasında əlaqələrin daha geniş strateji əməkdaşlığa çevrilə biləcəyi ilə bağlı qiymətləndirmələri gücləndirib.
