Rusiya Avropa İttifaqında təsir imkanlarının bir hissəsini bərpa edə bilər. Buna səbəb kimi Kremlin mövqeyinə yaxınlığı ilə tanınan Bolqarıstanın keçmiş prezidenti Rumen Radevin seçkilərdə inamlı qələbə qazanması göstərilir. Bu nəticə onun partiyasına hökuməti təkbaşına formalaşdırmaq imkanı verib...
Poliqon xəbər verir ki, bu barədə The Washington Post yazır.
Seçkilərin nəticələri Bolqarıstanda təxminən 20 illik siyasi durğunluğun və koalisiya idarəçiliyinin sona çatdığını göstərir. Kreml Radevin qələbəsindən təsirləndiyini bildirib. Bu hadisə Macarıstanın baş naziri Viktor Orbanın seçkilərdə məğlubiyyətindən cəmi bir həftə sonra baş verib. Orban əvvəllər Moskvanın Avropadakı əsas müttəfiqlərindən biri hesab olunurdu.
Kremlin sözçüsü Dmitri Peskov bildirib ki, hələlik Avropanın Rusiyaya münasibətində ümumi dəyişikliklər barədə danışmaq tezdir. Bununla belə, o, Radevin bəyanatlarının Avropa siyasətçilərini Rusiya ilə daha "pragmatik dialoqa" yönəldə biləcəyini qeyd edib.
Rumen Radev kimdir?
Keçmiş qırıcı pilot olan Rumen Radev bu ilin yanvarına qədər əsasən simvolik xarakter daşıyan prezident vəzifəsini tutub. O, korrupsiyaya qarşı etirazlar fonunda populyarlaşaraq siyasi səhnədə güclü fiqura çevrilib. Həmin etirazlar hökumətin istefasına və son beş ildə ölkədə səkkizinci parlament seçkilərinin keçirilməsinə səbəb olub.
Radev Bolqarıstanın avrozonaya qoşulmasını da şübhə altına alıb və bunun qiymət artımına səbəb olduğunu bildirib. O, həmçinin Ukraynaya yardıma qarşı çıxaraq Rusiya ilə münasibətlərin bərpasını dəstəklədiyini açıq şəkildə ifadə edib.
Qələbəsindən sonra o bildirib ki, güclü Bolqarıstan və güclü Avropa tənqidi düşüncə və praqmatizm tələb edir və Avropada yeni təhlükəsizlik arxitekturasının yaradılmasına çağırış edib. Bu isə Kremlin əsas tezislərindən biri ilə səsləşir.
Seçkilərin mümkün nəticələri
Səslərin 91 faizdən çoxunun sayılmasından sonra Radevin Proqressiv Bolqarıstan Partiyası 240 yerlik parlamentdə azı 135 mandat qazanıb. Qərbyönlü liberal "Dəyişiklikləri davam etdiririk" koalisiyası 15 faiz, keçmiş baş nazir Boyko Borisovun GERB Partiyası isə 13 faiz səs toplayıb.
Bolqarıstan iqtisadiyyatı böyük ölçüdə Avropa İttifaqının maliyyə dəstəyindən asılıdır. Analitiklər hesab edir ki, bu amil Radevin Orban kimi kəskin addımlar atmasını çətinləşdirir. Buna baxmayaraq, onun güclü nəticəsi Rusiyanın enerji resurslarının idxalına qadağa ilə bağlı Aİ təşəbbüslərinə qarşı çıxışını gücləndirə bilər.
Bolqarıstan "Türk axını" qaz kəməri vasitəsilə Rusiyadan Macarıstana ötürülən qaz üçün əsas tranzit ölkələrdən biridir. Bundan əlavə, ölkədə Rusiyanın Avropadakı iri neft emalı obyektlərindən biri yerləşir.
Ekspert Dimitar Beçev bildirib ki, Bolqarıstan adətən Brüsseldə səsvermələri bloklamamaq xəttini tutur və bu baxımdan Orbandan fərqlənir. Bununla belə, Radev hakimiyyətə gəldikdən sonra daha sərt prorusiya siyasəti yürüdərsə, daxili etirazlarla üzləşə bilər.
Keçmiş baş nazir Kiril Petkov isə bildirib ki, onun partiyası korrupsiyaya qarşı mübarizədə Radevi dəstəkləyəcək, lakin Avropa İttifaqının siyasətinə zidd addımlara qarşı çıxacaq.
Poliqon.info
