“WhatsApp” tətbiqi “Plus” adlı ödənişli abunəni test etməyə başlayıb və bu paket tətbiqin fərdiləşdirilməsi funksiyalarını təqdim edir. “WABetaInfo”nun məlumatına görə, abunə artıq məhdud sayda istifadəçi üçün əlçatandır. Qiymət regiondan asılı olaraq dəyişəcək, məsələn, Avropada aylıq 2,49 avro təşkil edəcək.
“WhatsApp”ın əsas funksiyaları pulsuz olaraq qalacaq. Abunə çərçivəsində istifadəçilər eksklüziv animasiyalı stiker paketlərinə çıxış əldə edəcək, tətbiqin mövzularını və ikonlarını dəyişə biləcək, həmçinin əlavə zəng melodiyalarından istifadə edə biləcəklər. Bununla belə, “TechCrunch” qeyd edir ki, abunə tətbiqdən reklamı aradan qaldırmayacaq.
“WhatsApp Plus”un digər bir funksiyası isə standart 3 çat limiti əvəzinə 20 çatı sabitləmək imkanıdır. Nəşrin məlumatına görə, gələcəkdə “Meta” abunəni “daha dəyərli” etmək üçün yeni funksiyalar əlavə etməyi planlaşdırır.
Hazırda “Meta” “WhatsApp”ı əsasən reklam hesabına monetizasiya edir. Bundan əlavə, biznes hesabları üçün “Meta Verified” adlı ödənişli abunə mövcuddur. “AndroidPolice” qeyd edir ki, 2026-cı ilin yanvarında Android üçün beta versiyada kanallarda və “statuslarda” reklamı söndürən ayrıca ödənişli abunəyə dair işarələr də aşkar edilib.
