Həsrət Cəfərov: “Qızıl”ımı qızıma həsr edirəm”

Yunan-Roma güləşi üzrə 4 qat Avropa çempionu olmuş Həsrət Cəfərov (67 kq) Tiranadakı yarışla bağl təəssüratlarını bölüşüb.

Arena.az xəbər verir ki, o, Azərbaycan Güləş Federasiyasının mətbuat xidmətinə açıqlamasında bunları söyləyib:

“Təəssüratlarım həqiqətən çox gözəldir. Bu gün çox sevincliyəm. Ardıcıl 4-cü “qızıl”ımı qazanıram. Həqiqətən də bu qızıl medalların arxasında böyük əziyyət, zəhmət dayanır. Bu “qızıl”ı qazandıqdan sonra onun həzzini indi hiss edirəm. Heç bir əziyyət yadıma düşmür. Yalnız yadda qalan bu “qızıl” olur. Bu “qızıl”ımı, tarixi uğurumu qızıma həsr edirəm”.

Xatırladaq ki, Albaniyanın paytaxtı Tiranada keçirilən Avropa çempionatında 67 kq çəki dərəcəsində mübarizə aparan Həsrət Cəfərov startda isveçli Niklas Oehleni 5:1 hesabıyla üstələyib. Titullu güləşçimiz bolqarıstanlı Abu Muslim Amayevi isə “tuş”la yolundan kənarlaşdırıb. Cəfərov gərgin keçən yarımfinal görüşündə gürcüstanlı Dieqo Çxikvadzeyə 4:2 hesabıyla qalib gələrək finala yüksəlib. Həsrət həlledici görüşdə də türkiyəli Murat Fıratdan üstün olub – 7:5.