Müəllif: Tamara Mustafayeva, Banco.az
Avropa avtomobil bazarı elektrikli və hibrid modellərə marağın artması fonunda mart ayında güclü bərpa nümayiş etdirib.
Banco.az xəbər verir ki, “ACEA” məlumatlarına əsasən, ötən ay qeydə alınan 11 faizlik artım 2024-cü ilin aprelindən bəri müşahidə olunan ən kəskin aylıq yüksəliş kimi qeyd olunub.
Bazarın genişlənməsində əsas amil olan elektrikli avtomobil satışları region üzrə 42 faiz artıb. Avropanın ən böyük bazarı olan Almaniyada isə yeni subsidiyalaşdırma proqramları və daha münasib qiymətli modellərin bazara çıxarılması nəticəsində elektrikli avtomobil satışları 66 faiz yüksəlib.
Mart ayının göstəriciləri Çin istehsalçılarının Avropa bazarındakı yüksəlişini və “Tesla”nın geri dönüşünü aydın şəkildə ortaya qoyur:
2025-ci ildə zəif nəticələrdən sonra sürətli artım mərhələsinə daxil olan “Tesla”nın satışları 84 faiz artaraq 52 600 ədədə çatıb.
Avropadakı satışlarını iki dəfədən çox artıran “BYD” isə 37 580 avtomobil həcminə nail olub. Şirkət regionda lobbiçilik imkanlarını genişləndirmək məqsədilə “ACEA”ya qoşulan ilk Çin markası olmağı hədəfləyir və Macarıstandakı zavodunda bu rübdə kütləvi istehsala başlamağı planlaşdırır.
Bizi sosial şəbəkələrdən izləyin!!
