Bakı, 27 aprel, AZƏRTAC
Ötən il qlobal hərbi xərclər 2024-cü illə müqayisədə 2,9 faiz artaraq 2,887 trilyon dollara çatıb.
AZƏRTAC xəbər verir ki, bu barədə Stokholm Beynəlxalq Sülh Araşdırmaları İnstitutunun yeni hesabatında bildirilir.
İnstitutun mütəxəssislərinin fikrincə, hərbi xərclər ABŞ-də azalsa da, Avropada 14 faiz, Asiya və Okeaniyada isə 8,1 faiz artıb. Ən böyük üç hərbi xərcləyici – ABŞ, Çin və Rusiya – birlikdə 1,48 trilyon dollar, yəni qlobal xərclərin 51 faizini təşkil edib.
Qlobal hərbi xərclər ardıcıl 11-ci ildir artır. Bu xərclərin ÜDM-də payı 2,5 faizə çatıb ki, bu da 2009-cu ildən bəri ən yüksək göstəricidir.
2025-ci ildə hərbi xərclərə görə ilk beş ölkə - ABŞ, Çin, Rusiya, Almaniya və Hindistan olub. Bu ölkələr birlikdə qlobal hərbi xərclərin 58 faizini təşkil ediblər.
İnstitutun Hərbi Xərclər və Silah İstehsalı Proqramının tədqiqatçısı Xiao Liang bildirib: “Dövlətlər müharibə, qeyri-müəyyənlik və geosiyasi gərginliyin davam etdiyi bir şəraitdə genişmiqyaslı silahlanma proqramlarına üstünlük verirlər. Mövcud böhranların miqyası və bir çox ölkənin uzunmüddətli hərbi xərclərlə bağlı hədəfləri nəzərə alınarsa, bu artımın 2026-cı ilin sonuna və daha sonrakı dövrdə də davam edəcəyi ehtimal olunur”.
