Sağlam olmayan bağırsaq şişkinlik, həzm pozğunluğu, enerji azlığı və hətta əhvalın pisləşməsinə səbəb ola bilər.
Gündəlik vərdişlərdə ediləcək kiçik dəyişikliklərlə bağırsaq sağlamlığını yaxşılaşdırmaq mümkündür.
Bağırsaqlarımızda yaşayan bakteriya, göbələk və digər mikroorqanizmlərdən ibarət olan bağırsaq mikrobiomu həzm, immunitet, iştaha və psixi sağlamlığımıza mühüm təsir göstərir. Mütəxəssislər bildirirlər ki, düzgün rutin sayəsində mikrobiomu qısa müddətdə yaxşılaşdırmaq mümkündür.
1. Daha çox və müxtəlif bitki mənşəli qidalar yeyin
Araşdırmalara görə, bağırsaq sağlamlığına ən çox təsir edən faktor qidalanmadır. Tərəvəz, meyvə, paxlalılar, toxumlar, çərəzlər və tam taxıllar liflə zəngindir və faydalı bağırsaq bakteriyalarını qidalandırır. Banan, soğan, sarımsaq, pırasa, yulaf, qulançar, yaban mersini və qreypfrut probiotik təsirə malik qidalar sayılır.
2. Fermentləşdirilmiş qidaları artırın
Yoğurt, kefir, kombuça, kimçi və turşu kimi fermentləşdirilmiş qidalar faydalı bakteriyalarla zəngindir. Bu məhsullar bağırsaq florasının balansını qorumağa kömək edir.
3. Həddindən artıq işlənmiş qidalardan uzaq durun
Mütəxəssislər bildirir ki, çox işlənmiş qidalar bağırsaqdakı bakteriya müxtəlifliyini azaldır və mikrobioma mənfi təsir göstərir.
4. Bağırsaqlarınıza istirahət verin
Axşam yeməyi ilə səhər yeməyi arasında təxminən 12 saat fasilə vermək bağırsaq mikroblarının bərpasına kömək edə bilər. Keyfiyyətli yuxu da bağırsaq sağlamlığı üçün vacib hesab olunur.
5. Mütəmadi idman edin
Araşdırmalar göstərir ki, fiziki aktivlik yalnız ümumi sağlamlığa deyil, bağırsaq mikrobiomuna da müsbət təsir edir. Daimi hərəkət faydalı bakteriyaların artmasına kömək edir. (axsam.az)
