ABŞ su təsərrüfatı infrastrukturunu təhdid edən mikroskopik invaziv midiyalara qarşı həll tapmaq üçün genişmiqyaslı axtarışa başlayıb.
HİT.az xəbər verir ki, "EcoNews"un məlumatına görə, söhbət Kaliforniyanın su və enerji sistemlərini ciddi risk altına alan kiçik molyusklardan gedir.
Su menecerlərinin bildirdiyinə görə, vəziyyət kritikdir: çılpaq gözlə görmək belə çətin olan bu orqanizmlər borulara və nasoslara daxil olaraq su təchizatı və enerji sistemlərinin sıradan çıxmasına səbəb ola bilər.
Problemin həlli üçün ABŞ Reklamasiya Bürosu “Stop the Hitchhiker” adlı xüsusi müsabiqə elan edib. Qurumun açıqlamasına əsasən, ən yaxşı komanda bütün mərhələlər üzrə ümumilikdə 200 000 dollara qədər mükafat qazana bilər.
Başlıca təhlükə odur ki, midiyalar qayıqların içində qalan gizli su qalıqları vasitəsilə yayılır. Mütəxəssisləri xüsusilə gəmilərin ballast bölmələri narahat edir, çünki su orada qurudulmuş kimi görünsə də, əslində qalmağa davam edir.
Söhbət zebra midiyası, kvaqqa midiyası və qızılı midiyadan gedir. Bu orqanizmlər o qədər sıx kütlələr yaradır ki, avadanlıqların içində “canlı qum qatı”na bənzər təbəqə formalaşdırırlar.
Mütəxəssislərin hesablamalarına görə, bu invaziv növlər artıq dövlətə ildə təxminən 40 milyard manat (1 milyard dollardan çox) zərər vurur. Əgər onların qarşısı alınmasa, gələcəkdə əhali elektrik enerjisiz, fermerlər isə suvarma suyundan məhrum qala bilər.
Su invaziv növlər üzrə mütəxəssis Vest Bişop bildirib ki, bu midiyalar ekosistem üçün ciddi təhlükədir və onların su təchizatı və kənd təsərrüfatına böyük zərər vermə potensialı var. Rəsmilərdən Maykl Bərk isə problemin qarşısını almaq üçün bütün imkanlardan istifadə ediləcəyini qeyd edib.
Müsabiqə 2026-cı ilin may ayının sonuna qədər davam edəcək. Alimlər həll yolları axtararkən, qayıq sahiblərinə avadanlıqlarını diqqətlə təmizləmək və tam qurulamaq tövsiyə olunur.
Samir
