Dnepropetrovsk vilayətinin Şaxtyorsk qəsəbəsində Ukrayna Silahlı Qüvvələrinin “Da Vinçinin canavarları” (Volki Da Vinçi) bölməsinin hərbçilərinin iştirakı ilə ağır cinayət hadisəsi baş verib. Polisin məlumatına görə, münaqişə zamanı bölmənin üç döyüşçüsü 20 yaşlı gənci amansızlıqla döyüb, daha sonra onu huşsuz vəziyyətdə avtomobilə qoyaraq qaçırıblar. Hadisə zamanı hərbçilər mağaza binasına tərəf atəş də açıblar.
NOCOMMENT.az xəbər verir ki, zərərçəkmiş şəxs tapılaraq xəstəxanaya yerləşdirilib, şübhəli bilinən hərbçilər isə qonşu yaşayış məntəqəsində gizlənməyə çalışarkən saxlanılıblar. Saxlanılan şəxslərin öz hərbçiləri olduğunu artıq “Da Vinçinin canavarları” batalyonu da rəsmən təsdiqləyib.
Bölmə rəhbərliyi hadisə ilə bağlı kəskin bəyanat yayaraq bildirib ki, döyüş təcrübəsi və xidmətlər törədilən bu əmələ haqq qazandıra bilməz. Faktla bağlı daxili araşdırmanın başladıldığı, hüquq-mühafizə orqanları ilə tam əməkdaşlıq edildiyi və günahkarların qanun qarşısında ən ağır cəzanı alacağı vurğulanıb. Həmçinin qeyd olunub ki, bölmənin digər şəxsi heyəti icmanın rifahı üçün fəaliyyətini davam etdirəcək.
Sara,
NOCOMMENT.az
