Pandemiya dövrünün internet fenomeni olan "Gamestop" videooyun pərakəndə satıcısı 2000-ci illərin ən məşhur elektron ticarət platformalarından olan "Ebay"ə 55,6 milyard dollarlıq gözlənilməz satınalma təklifi təqdim edib.
AFN.az xəbər verir ki, "Gamestop"un bu addımı maliyyə dünyasında böyük maraqla qarşılanıb. Hazırda "Ebay"in 5 faizlik payına sahib olan "Gamestop" hər səhm üçün 125 dollar ödəməyi təklif edib ki, bu da "Ebay"in fevral ayındakı qiymətləri ilə müqayisədə 46 faiz daha yüksək qiymət deməkdir.
"Gamestop"un icraçı direktoru (CEO) Rayan Koen "Wall Street Journal"a verdiyi müsahibədə bu birləşmənin əsas hədəfinin "Ebay"i "Amazon"a qarşı daha güclü və ciddi bir rəqibə çevirmək olduğunu bildirib.
Koen qeyd edib ki, "Gamestop"un ABŞ-dakı təxminən 1600 mağazası "Ebay" üçün məhsulların qəbulu, orijinal olub-olmadığının yoxlanılması və çatdırılma nöqtəsi kimi xidmət edə bilər. Təklifin 50 faizinin nəğd, qalan 50 faizinin isə "Gamestop" səhmləri ilə ödənilməsi planlaşdırılır.
Analitiklər bu gedişi pərakəndə satış sektorunda ənənəvi mağaza zəncirlərinin rəqəmsal bazar yerləri ilə birləşərək yeni bir dövr başlatma cəhdi kimi qiymətləndirirlər.
