Körfəzin ən böyük neft istehsalçılarından olan Birləşmiş Ərəb Əmirlikləri (BƏƏ) enerji siyasətində köklü dəyişiklik edərək əvvəlcə Neft İxrac Edən Ölkələr Təşkilatı (OPEC) ilə “OPEC plus”-dan daha sonra isə Ərəb Neft İxrac Edən Ölkələr Təşkilatından (OAPEC) ayrıldığını elan edib.
Məsələ ilə bağlı rəsmi bildiriş BƏƏ-nin Enerji və İnfrastruktur naziri Süheyl Məhəmməd əl-Məzrui tərəfindən təşkilatın hazırkı sədrinə təqdim olunub və ayrılma prosesinin 2 may 2026-cı il tarixindən etibarən tamamlandığı bildirilib.
BƏƏ-nin bu radikal qərarının arxasında neft hasilatı gücünü tam şəkildə öz nəzarətində istifadə etmək istəyi dayanır. Ölkə uzun müddətdir OPEC tərəfindən ona ayrılan kvotaları kifayət etməyən hesab edir və milyonlarla barel əlavə hasilat potensialını işə salmaq istəyirdi.
Enerji naziri əl-Məzrui qərarın yalnız iqtisadi deyil, həm də siyasi səbəblərlə bağlı olduğunu qeyd edib. Xüsusilə bölgədə gərginliyin artdığı bir dövrdə, Fars körfəzində əsas ixrac marşrutlarını məhdudlaşdıran amillər BƏƏ-ni öz strateji prioritetlərini müəyyənləşdirməkdə daha qətiyyətli edib.
