Azərbaycanlı reper Nəvai Bəkirovun Moskvada düşdüyü ağır qəza ilə bağlı yeni təfərrüatlar məlum olub.
Musavat.com xəbər verir ki, hadisə zamanı reper avtomobildə tək olmayıb. Onun yanında sərnişin də olub. İlkin məlumata görə, qəza nəticəsində nə sürücü, nə də sərnişin xəsarət alıb.
“Maş” teleqram kanalına danışan şahidlərin sözlərinə görə, Nəvainin idarə etdiyi “Ferrari” yüksək sürətlə hərəkətdə olub. Zubovski bulvarında sportkarın idarəetmədən çıxdığı, yol kənarına doğru sürüşərək maneələrə çırpıldığı bildirilir. Zərbədən sonra avtomobilin təhlükəsizlik yastıqları açılıb.
Qəza nəticəsində bahalı avtomobilə ciddi ziyan dəyib. Məlumata görə, söhbət qiyməti təxminən 47-68 milyon rubl arasında dəyişən “Ferrari 488 Pista” modelindən gedir. Avtomobilin ön hissəsi dağılıb, təkərləri qopub, kuzovunda ciddi əziklər yaranıb. Təmir xərclərinin on milyonlarla rubla başa gələ biləcəyi bildirilir.
Nəvai qəzanın səbəbini avtomobildəki yarış təkərləri ilə izah edib. O, maşına dövlət nömrə nişanı taxmamasını isə “Ferrari”ni bu yaxınlarda alması ilə əlaqələndirib.
Reper hadisə ilə bağlı qısa açıqlamasında bildirib: “Maşına heyfim gəlmir, əsas odur ki, hamı sağ-salamatdır”.
Qeyd edək ki, həmin gün Moskvada Nəvainin “Девочка-война” klipində çəkilən Kseniya Dobromilova da yol qəzasında həlak olub. Təxminən bir saat yarım sonra isə reperin özü qəzaya düşüb.
Musavat.com
