“Bəzi sosial şəbəkə istifadəçiləri belə bir məlumat yayırlar ki, guya həbsxanalarda vəziyyət ürəkaçan deyil, həm müxalifətyönlü məhkumlar, həm də adi məhbuslar təzyiqlərə məruz qalırlar. Bu, dezinformasiyadır, faktlara və arqumentlərə söykənmir”.
Bu sözləri Pravda.az-a açıqlamasında Milli Məclisin deputatı Elman Nəsirov deyib.
Deputat vurğulayıb ki, Azərbaycan demokratik inkişaf yolunu seçmiş dövlətdir: “Bu dövlətdə əsas məsələ və prinsip hüququn aliliyidir. Yeri gəlmişkən deyim ki, Ombudsman Aparatının əməkdaşları tez-tez bütün həbsxanalarda olurlar, monitorinq keçirirlər. Xarici ölkələrdən gələn insan hüquqlarının müdafiəçiləri də həmin həbsxanalara baş çəkirlər. Heç bir halda qeyd olunan hallar baş verməyib. Heç bir təzyiqdən söhbət gedə bilməz. Bu, ictimai fikri çaşdırmaqdan başqa bir şey deyil. Ortada fakt, əsaslandırılmış yanaşmalar yoxdur. Mənə belə gəlir ki, bu, “həbsxanalarda vəziyyət yaxşı deyil” düşüncəsinə əsaslanan subyektiv mövqedir. Dəfələrlə Penitensiar Xidmətin əməkdaşları ilə birlikdə həbsxanalarda olmuşam. Öz gözlərimlə prosesləri izləmişəm. Həmçinin bəzi hallarda dostlarımız, mətbuat işçiləri, həmkarlarımız söyləyirlər ki, həbsxanalarda yaxşı şərait var, yeni binalar təchiz edilib, infrastruktur ən yüksək səviyyədədir. Təcridxanalar, həbsxanalar sanki bu istiqamətdə nümunəvi vəziyyətdədir. Seçicilərimin övladları arasında da həbsxana həyatı yaşayanlar var. Görüşlərdə onlarla maraqlanmışam. Deyirlər ki, artıq həbsxanalarda neqativ hallar çoxdan aradan qaldırılıb. Nəyinsə müqabilində kimlərəsə xidmət etmək yanaşması artıq yoxdur, “əl əli yuyar, əl də üzü” prinsipi işləmir. Məhbusların qidalanmalarından tutmuş geyimlərinə qədər hər şey keyfiyyətcə yüksəlib. Bunu seçicilərim mənə deyirlər. Buna görə də hesab edirəm, bu kimi iddiaların heç bir real əsası yoxdur. Atılan addımlara, görülən işlərə kölgə salmaqdan başqa bir şey deyil”.
Aytəkin Qardaşova
