Ürəyiniz lahmacun istəyirsə, amma xəmir yoğurmağa vaxtınız yoxdursa, bu praktik üsul tam sizin üçündür.
Pravda.az bildirir ki, cəmi bir neçə dəqiqəyə hazırlanan bu ləzzət həm xırtıldayan, həm də çox dadlıdır.
Lazım olan ərzaqlar:
6 ədəd lavaş (hazır)
300 qram orta yağlı dana qiyməsi
1 ədəd iri soğan
2 ədəd yaşıl bibər
1 ədəd qırmızı bibər
2 ədəd pomidor
Yarım dəstə cəfəri
1 xörək qaşığı tomat pastası (bibər pastası ilə qarışıq da ola bilər)
Yarım çay stəkanı duru yağ
Duz, istiot, pul bibər, zirə (zövqə görə)
Hazırlanma qaydası:
İçliyin hazırlanması: Soğanı, bibərləri, pomidoru və cəfərini çox narın şəkildə doğrayın (və ya blenderdən keçirin, amma çox suyunun çıxmamasına diqqət edin).
Qarışdırma: Doğranmış tərəvəzləri qiymə ilə bir qaba qoyun. Üstünə tomatı, duru yağı və ədviyyatları əlavə edib yaxşıca yoğurun.
Lavaşların hazırlanması: Sobanın sinisinə (listinə) yağlı kağız sərin. Bir ədəd lavaşı siniyə qoyun.
İçliyin çəkilməsi: Hazırladığınız qiyməli qarışığın bir hissəsini lavaşın üzərinə hər tərəfə bərabər yayılacaq şəkildə nazik təbəqə halında sürtün. (Çox qalın qoymayın ki, həm lavaş yumşalmasın, həm də ət tez bişsin).
Bişirilməsi: Əvvəlcədən 200 dərəcə qızdırılmış sobada lavaşların kənarları qızarana və qiymə tam bişənə qədər (təxminən 8-10 dəqiqə) bişirin.
Servis: İsti-isti, yanında bol göyərti, limon və ayran ilə servis edin.
Qeyd: Əgər lahmacunun daha xırtıldayan olmasını istəyirsinizsə, iki lavaşı arasına azca duru yağ sürtərək üst-üstə qoyub, qiyməni ən üst qata çəkə bilərsiniz.
Əminə Bayramova
