Idman.biz saytından verilən məlumata görə, ain.az xəbər verir.
Azərbaycanlı MMA döyüşçüsü 18 ildən sonra kəmər görüşünü doğma divarlar arasında keçirəcək.
Peşəkar MMA döyüşçüsü Vüsal Azərioğlu sabah, mayın 10-da Bakıda keçiriləcək "Karabakh Fight Championship" turnirində çempionluq kəməri uğrunda döyüşəcək. Ağır çəki dərəcəsində (93+ kq) çıxış edən idmançı gürcüstanlı Beka Çxipuri ilə üz-üzə gələcək.
Döyüş Bakıdakı Sərhədçi İdman Kompleksində baş tutacaq. İdmançı bildirib ki, gecənin əsas qarşılaşmalarından biri məhz onun döyüşü olacaq.
36 yaşlı idmançı Gəncə ilə bağlı fikirlərini də bölüşüb:
"Gəncədənəm, uşaqlığım orada keçib. Amma 17 ildir Türkiyədə yaşayıram. Gəncə şəhər 31 nömrəli tam orta məktəbdə oxumuşam", - deyə o, gencexeber.az-a açıqlamasında bildirib.
Döyüşçü vurğulayıb ki, Azərbaycan və Türkiyə bayraqları altında çıxış edəcək:
"İnşallah öz Vətənimdə, evimdə döyüşəcəyəm. Qarabağ adını daşıyan bir kəmər uğrunda mübarizə aparmaq mənim üçün böyük qürurdur. Qələbəni bütün Gəncə xalqına hədiyyə etmək istəyirəm", – Vüsal Azərioğlu əlavə edib.
Qeyd edək ki, "Karabakh Fight Championship" turnirində dünyaca məşhur UFC çempionatında çıxış edən bir sıra tanınmış döyüşçülərin də iştirak edəcəyi bildirilir.
İdman.Biz
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
