Birləşmiş Ərəb Əmirlikləri (BƏƏ) İsrailin Baş naziri Benyamin Netanyahunun ölkəyə səfər etdiyi və İsrail hərbi heyətinin qəbul olunduğu ilə bağlı xəbərləri təkzib edib.
"Cebheinfo.az" xəbər verir ki, BƏƏ Xarici İşlər Nazirliyinin X sosial media platformasındakı hesabında yayımlanan açıqlamada İsrail Baş nazirinin ölkəyə səfər etdiyi və ya BƏƏ ərazisində hər hansı İsrail hərbi heyətinin qəbul edildiyi barədə xəbərlərin həqiqəti əks etdirmədiyi bildirilib.
Açıqlamada qeyd olunub ki, BƏƏ-nin İsraillə münasibətləri Abraham sazişləri çərçivəsində institusional xarakter daşıyır və gizli səfərlər və ya rəsmi qurumlar tərəfindən açıqlanmayan görüşlərin keçirildiyi barədə iddialar doğru deyil.
Media qurumlarına təsdiqlənməmiş məlumatları yaymamaq çağırışı edilən açıqlamada belə xəbərlərin siyasi təəssürat yaratmaq məqsədilə istifadə edilməməsi lazım olduğu vurğulanıb.
İsrail Baş nazirlik Ofisinin yaydığı açıqlamada Baş nazir Netanyahunun ABŞ və İsrailin İrana hücumları ilə başlayan müharibə zamanı BƏƏ-yə gizli səfər etdiyi bildirilmişdi.
Məlumata görə, Netanyahu səfər çərçivəsində BƏƏ Prezidenti Şeyx Məhəmməd bin Zayed Al Nəhyan ilə görüşüb.
ABŞ-nin Axios xəbər platforması aprelin 26-da yayımladığı xəbərdə İsrail ilə BƏƏ arasında hərbi, təhlükəsizlik və kəşfiyyat əməkdaşlığının müharibə dövründə ən yüksək səviyyəyə çatdığını yazmışdı.
Axios-a danışan rəsmilər Netanyahunun Al Nəhyan ilə müharibənin ilk günlərində keçirdiyi görüşdən sonra İsrail ordusuna məxsus “Dəmir Qübbə” hava müdafiə sisteminin və onu idarə edən onlarla israilli hərbçinin BƏƏ-yə göndərilməsi barədə göstəriş verdiyini iddia etmişdi.
ABŞ-nin İsraildəki səfiri Mayk Hakabi isə Təl-Əvivdə qatıldığı konfransda İsrailin müharibə zamanı BƏƏ-yə “Dəmir Qübbə” sistemləri və onların istifadəsinə kömək edəcək hərbçilər göndərdiyini təsdiqləmişdi.
