"Ukrayna və Moldova liderləri Moskvanın addımını həm hərbi məqsəd, həm də regionun mənimsənilməsi cəhdi kimi qiymətləndirirlər..."
Ukrayna prezidenti Vladimir Zelenski Rusiyanın Dnestryanı bölgəsinin sakinlərinə vətəndaşlıq verilməsini asanlaşdıran qərarına sərt reaksiya verib.
Moderator.az xəbər verir ki, bu barədə "dw.com" nəşri yazıb.
Zelenskidən Moskvaya sərt mesaj
Ukrayna lideri bildirib ki, bu addım təkcə yeni əsgərlər toplamaq məqsədi daşımır, eyni zamanda Moskvanın regionu öz ərazisi kimi təqdim etməyə çalışdığını göstərir. "Onlar deyirlər ki, yalnız Donbas maraqlandırır. Əslində isə məsələ bununla məhdudlaşmır", - deyə Zelenski vurğulayıb. O əlavə edib ki, Moskva başqa ölkələrin torpaqları ilə deyil, öz neft emalı zavodları və daxili problemləri ilə məşğul olmalıdır.
Ukrayna prezidenti məlumat verib ki, məsələ ilə bağlı Ukrayna Xarici İşlər Nazirliyinə Moldova ilə əlaqə saxlayaraq birgə qiymətləndirmə və koordinasiyalı addımlar hazırlamaq tapşırılıb. Onun sözlərinə görə, Rusiyanın Dnestryanıda hərbi kontingent və xüsusi xidmət strukturları saxlaması Ukrayna üçün əlavə təhlükə yaradır.
"Rusiyaya daha çox əsgər lazımdır"
Moldova prezidenti Maya Sandu Putinin qərarını Ukraynaya qarşı müharibə üçün əlavə canlı qüvvə toplamaq cəhdi kimi qiymətləndirib. Onun fikrincə, Kreml bu üsulla həm də Moldovaya təzyiq göstərməyə və Dnestryanı məsələsində vəziyyəti gərginləşdirməyə çalışır.
Sandu bildirib ki, Ukraynada müharibə başlayandan sonra Dnestryanı sakinlərinin əksəriyyəti özlərini daha təhlükəsiz hiss etmək üçün Moldova vətəndaşlığını seçib. O, həmçinin Rusiyanın Moldovanın Avropa İttifaqına inteqrasiyasına mane ola bilməyəcəyini vurğulayıb.
Putin Dnestryanı üçün qaydaları dəyişib
Xatırladaq ki, Vladimir Putin imzaladığı yeni fərmanla Dnestryanıda yaşayan şəxslərə Rusiyada yaşamadan və rus dilini bilmədən sadələşdirilmiş qaydada Rusiya vətəndaşlığı almaq imkanı verib. Rəsmi Moskva qərarın "insan hüquq və azadlıqlarının qorunması" məqsədi daşıdığını bildirsə də, həm Kiyev, həm də Kişinyov bunu regionda təsir imkanlarını genişləndirməyə yönəlmiş addım hesab edir.
