ABŞ vətəndaşlarının Almaniyadakı hərbi bazaya təxliyəsi ehtimalı nəzərdən keçirilir...
Konqo Demokratik Respublikasında Ebola virusuna mümkün yoluxma halları ilə bağlı narahatedici məlumatlar yayılıb.
Poliqon xəbər verir ki, bu barədə CBS News telekanalı məlumat yayıb.
Məlumata görə, ən azı altı ABŞ vətəndaşının Ebola virusuna yoluxma ehtimalı var. Beynəlxalq humanitar təşkilatlardakı mənbələr bildiriblər ki, həmin şəxslərin hazırda hələ də Konqo Demokratik Respublikasında olub-olmadığı dəqiq məlum deyil.
Mövcud məlumatlara əsasən, üç ABŞ vətəndaşı yüksək yoluxma riski ilə qarşılaşıb. Onlardan birində artıq Ebola virusuna xas simptomların müşahidə olunduğu qeyd edilir. Bununla belə, rəsmi laborator təsdiqi barədə məlumat verilməyib.
ABŞ Xəstəliklərə Nəzarət və Profilaktika Mərkəzinin (CDC) mayın 17-nə olan məlumatına görə, Konqoda Ebola virusuna yoluxma ilə bağlı 300-dən çox ehtimal olunan hal qeydə alınıb. Onlardan səkkizi laborator analizlə təsdiqlənib.
Bundan əvvəl ABŞ vətəndaşlarının təhlükəsizlik məqsədilə Almaniyada yerləşən Amerika hərbi bazasına təxliyə edilə biləcəyi barədə məlumat yayılmışdı. Bildirilirdi ki, Ebola xəstələri ilə təmasda olmuş şəxslər həmin bazada karantinə alınaraq müalicə oluna bilərlər. Lakin ABŞ hakimiyyəti məsələ ilə bağlı hələlik rəsmi açıqlama verməyib.
Hazırkı Ebola epidemiyası Konqo Demokratik Respublikasının şərqində yerləşən İturi əyalətində qeydə alınıb və bu, ölkədə 1976-cı ildən bəri baş verən 17-ci Ebola yayılması hesab olunur.
Mütəxəssislər xatırladırlar ki, Ebola virusu yüksək ölüm göstəricisi ilə seçilən təhlükəli yoluxucu xəstəlikdir. Xəstəlik əsasən bədən mayeləri vasitəsilə yayılır və vaxtında müdaxilə edilmədikdə ağır nəticələrə səbəb ola bilir.
Tarixin ən ağır Ebola epidemiyalarından biri 2014–2016-cı illərdə Qərbi Afrikada baş verib. Həmin dövrdə virus 11 mindən çox insanın həyatına son qoymuşdu və beynəlxalq səhiyyə sistemində ciddi böhran yaratmışdı.
Poliqon.info
