Mütəxəssislər xəbərdarlıq edir ki, uzun müddət davam edən və səbəbsiz görünən yorğunluq bəzən ciddi xəstəliklərin ilk siqnallarından biri ola bilər.
Musavat.com Mayo Clinic-ə istinadən xəbər verir ki, xüsusilə keçməyən halsızlıq qan azlığı, qalxanabənzər vəz problemləri ilə əlaqəli ola bilər.
Dəmir çatışmazlığı nəticəsində yaranan anemiya insanlarda davamlı yorğunluq, nəfəs darlığı, başgicəllənmə və halsızlıq yarada bilər. Həkimlərin sözlərinə görə, bədəndə oksigen daşıyan qırmızı qan hüceyrələrinin azalması enerji səviyyəsini ciddi şəkildə aşağı salır.
Ekspertlərin diqqət çəkdiyi digər problem isə qalxanabənzər vəzin zəif fəaliyyəti — hipotiroidizmdir. Böyük Britaniyanın National Health Service məlumatına görə, bu xəstəlik zamanı maddələr mübadiləsi zəifləyir və insan özünü daimi yorğun, halsız və yuxulu hiss edir. Eyni zamanda üşümə, çəki artımı və yaddaş zəifləməsi də müşahidə oluna bilər.
Mütəxəssislər vurğulayırlar ki, yorğunluq həftələrlə davam edirsə və nəfəs darlığı, sürətli arıqlama, baş ağrısı və ya yaddaş problemləri ilə müşayiət olunursa, bunu sadəcə stress və ya yuxusuzluqla əlaqələndirmək düzgün deyil. Bu halda tibbi müayinədən keçmək tövsiyə olunur.
Musavat.com
