Bolqarıstanın Samokov şəhərində keçirilən U17 Avropa Çempionatında Azərbaycan sərbəst güləş komandası komanda hesabında ikinci yeri tutub. Oxuməni.az xəbər verir ki, bu barədə Azərbaycan Güləş Federasiyası məlumat verib.
Yarışda Azərbaycan güləşçiləri 156 xal toplayaraq 163 xalla qalib Rusiya komandasından cəmi yeddi xal geridə qalıblar. Gürcüstan komandası 124 xalla üçüncü yerdə qərarlaşıb.
Ümumilikdə, Azərbaycan komandası üç qızıl, bir gümüş və üç bürünc medal qazanıb.
Ermənistan, Gürcüstan, Ukrayna və Bolqarıstandan olan təmsilçilər də hərəyə bir qızıl medal qazanıblar.
Əsgərxan Novruzovun məşqçisi olduğu Azərbaycan komandasının heyətində Hüseyn Rzazadə, İbrahim Həsənov və Nihad Süleymanlı Avropa çempionu olublar. Rəşid Nəzərov gümüş, Tunar Həsənov, Abbas Şəfiyev və Hakim Tağıyev isə bürünc medal qazanıblar.
Bu yaş kateqoriyasında güləşçilər üçün növbəti U17 Dünya Çempionatı 27 iyunda Bakıda start götürəcək.
Almaz Həsənli
