BAKI, 20 may. TELEQRAF
Miqrasiya və urbanizasiya artıq bir-birindən ayrı şəkildə nəzərdən keçirilə bilməyəcəyinə dair artan anlayışı əks etdirir.
Teleqraf xəbər verir ki, bunu Beynəlxalq Miqrasiya Təşkilatının Baş direktorunun müavini Uqoçi Daniels WUF13 çərçivəsində keçirilən "Miqrasiya və şəhərlər: Təhlükəsiz, innovativ və dayanıqlı idarəetmə çərçivəsi" adlı tədbirdə deyib
O bildirib ki, bu gün miqrasiya əsasən şəhər xarakteri daşıyır və iqlim dəyişikliyi, münaqişələr, demoqrafik dəyişikliklər və artan bərabərsizliklə formalaşır: "2021-ci il üzrə Dünya Miqrasiya Hesabatı göstərir ki, hazırda dünyada 304 milyon beynəlxalq miqrant var və bu, qlobal əhalinin təxminən 3,7 faizini təşkil edir. Onların iqtisadi və sosial töhfəsi isə saylarından qat-qat böyükdür.Eyni zamanda dünya sürətlə urbanizasiya olunur və artıq dünya əhalisinin 65 faizdən çoxu şəhər mərkəzlərində yaşayır. Bu göstəricinin daha 15 faiz artacağı gözlənilir.
Məhz buna görə də Beynəlxalq Miqrasiya Təşkilatı olaraq Özbəkistandakı Dövlət Miqrasiya Xidməti ilə qlobal səviyyədə əməkdaşlıq etməyimiz çox vacibdir. Çünki biz bilirik ki, dünyanı dəyişdirən bu tendensiyalar şəhərləri miqrasiya idarəçiliyinin ön xəttinə çevirir. Miqrantlar əsasən iş yerlərinin, xidmətlərin, imkanların və sosial şəbəkələrin cəmləşdiyi şəhərlərdə məskunlaşırlar. Lakin şəhərlər eyni zamanda mənzil, infrastruktur, ictimai xidmətlər və sosial həmrəylik üzərində artan təzyiqlərlə üzləşirlər.
Buna görə də Beynəlxalq Miqrasiya Təşkilatı urban idarəetmə siyasətlərində inteqrasiya olunmuş miqrasiya planlaşdırılmasını, xidmət təminatını və dayanıqlılıq strategiyalarını dəstəkləyir. Miqrasiya sonradan düşünülən məsələ olmamalıdır. O, mənzil siyasətinə, ictimai nəqliyyata, iqlimə uyğunlaşmaya, ictimai səhiyyəyə və sosial inklüzivliyə inteqrasiya edilməlidir".
Uqoçi Danielsin sözlərinə görə, bu prosesin mərkəzində şəhərlərin qarşılaşdığı ən ciddi problemlərdən biri — mənzil məsələsi dayanır: "Şəhərlərin böyüməsi bərabər şəkildə baş vermir. Hazırda 1,1 milyarddan çox insan qeyri-kafi mənzil şəraitində yaşayır, 3 milyard insan isə müxtəlif formalarda mənzil təhlükəsizliyi problemi ilə üzləşir.
Urbanizasiya mövzusunun əsas mahiyyəti şəhərlərdə yaşayan dünya əhalisinin mənzil təminatıdır. Mənzil yalnız sığınacaq demək deyil. O, həm də inklüzivliyin, dayanıqlılığın və sosial həmrəyliyin təməlidir. Eyni zamanda, qlobal həllərin və məcburi köçkünlük problemlərinin qarşısının alınmasının əsas şərtlərindən biridir.
Təhlükəsiz və adekvat mənzil olmadan insanlar sağlamlıq baxımından riskli və sosial cəhətdən həssas şəraitdə yaşamağa məcbur olurlar.
Dünyanın müxtəlif yerlərində şəhərlər işsizlik, sürətli urbanizasiya və digər böhranların təzyiqlərini idarə etməyə çalışır, eyni zamanda Dayanıqlı İnkişaf Məqsədlərinə nail olmağa çalışırlar.
Bu isə böhranlara həssas urban idarəetmə yanaşmasını tələb edir ki, fövqəladə vəziyyətdən bərpa və davamlı inkişafa keçid təmin olunsun. Məhz buna görə yerli hökumətlər çox mühüm rol oynayır. Güclü çoxtərəfli tərəfdaşlıqlarla çalışan yerli idarəetmələr miqrasiyanı daha effektiv və dayanıqlı şəkildə idarə edə bilirlər".
