Azərbaycanın idxal bazarında son illərdə ciddi dəyişikliklər müşahidə olunur. Rəsmi statistikaya görə, ölkəyə ən çox texnologiya məhsulları, avtomobillər, avadanlıqlar, ərzaq malları və dərman preparatları gətirilir.
Əsas idxal tərəfdaşları isə Çin, Rusiya və Türkiyədir.
Azpost.info xəbər verir ki, Dövlət Statistika Komitəsinin məlumatına əsasən, 2025-ci ildə Azərbaycanın xarici ticarət dövriyyəsi 48,9 milyard dollara yaxın olub. Bunun təxminən 24,4 milyard dollarını idxal təşkil edib.
Ekspertlər bildirirlər ki, idxalın əsas hissəsini sənaye avadanlıqları, elektronika, minik avtomobilləri və gündəlik istehlak malları təşkil edir. Xüsusilə Çin istehsalı olan texnologiya məhsullarının bazardakı payı sürətlə artır.
İqtisadçıların fikrincə, Azərbaycanda yerli istehsalın zəif olduğu sahələrdə idxaldan asılılıq hələ də yüksəkdir. Məsələn, əczaçılıq məhsullarının böyük hissəsi xaricdən gətirilir. Eyni vəziyyət elektronika və bəzi ərzaq məhsulları üçün də keçərlidir.
Rəsmi məlumatlara görə, Azərbaycan ən çox məhsulu Çindən idxal edir. 2025-ci ilin ilk 9 ayında Çindən idxalın həcmi 3,3 milyard dolları keçib. İkinci yerdə Rusiya, üçüncü yerdə isə Türkiyə qərarlaşıb.
İqtisadçı ekspertlər hesab edirlər ki, son illərdə dolların məzənnəsinin sabit qalması idxalın artmasına təsir edib. Bununla yanaşı, daxili istehsalın zəif inkişafı xarici məhsullara tələbatı yüksəldir.
Bəzi mütəxəssislər xəbərdarlıq edirlər ki, idxaldan yüksək asılılıq gələcəkdə qiymət artımı risklərini gücləndirə bilər. Xüsusilə beynəlxalq nəqliyyat xərclərinin bahalaşması və geosiyasi böhranlar Azərbaycan bazarında qiymətlərə birbaşa təsir göstərir.
Sunay
