Bakı, 21 may, AZƏRTAC
Kütləvi köçkünlük zamanı humanitar yardımın kritik əhəmiyyəti olsa da, mənzil məsələsinin mürəkkəbliyindən qaçmaq üçün tez-tez "mənzil" əvəzinə "sığınacaq" terminindən istifadə olunur. Sığınacaq həyat qurtarıcı ola bilsə də, şəhər mühitində insanların uzun müddət çadırlarda və ya müvəqqəti şəraitdə qalması növbəti mərhələyə keçidi çox çətinləşdirir.
AZƏRTAC xəbər verir ki, bunu Beynəlxalq Ətraf mühit və inkişaf institutunun tədqiqatlar və strateji təsir üzrə direktoru Lüsi Erl BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “Böhrandan sonra mənzil bərpa və yenidənqurma işlərinin mərkəzindədir” mövzusunda tədbirdə deyib.
O qeyd edib ki, kütləvi mənzil istehsalı ilə bağlı edilən səhvlər də az deyil. Sosial mənzil proqramlarında və məcburi köçkünlər üçün tikilən evlərdə yer seçimi çox vaxt yanlış olur. İş yerlərindən uzaq, infrastrukturdan məhrum, "ruhlar şəhəri"nə çevrilən qutuya bənzər evlər tikilir. Bu vəziyyət qaçqın düşərgələrində daha ekstremal həddə çatır, çünki bu düşərgələr məqsədli şəkildə iş yerlərindən və ticarət marşrutlarından uzaqda yerləşdirilir. Qaçqın düşərgəsini şəhərə çevirmək çətindir, çünki insanlara hərəkət azadlığı və dolanışıq imkanları verilmədikdə, o yer yalnız görüntü olaraq şəhərə bənzəyə bilər.
Fotoqraf - Azər İbrahimov
