BAKI, 21 may. TELEQRAF
BMT Baş Assambleyası Qırğızıstan, Özbəkistan və Tacikistanın “Sərhəd mübahisələrinin dinc yolla həlli” qətnaməsini konsensusla qəbul edib.
Teleqraf xəbər verir ki, bu barədə Qırğızıstan Xarici İşlər Nazirliyinin mətbuat xidməti məlumat verib.
Sənədin həmmüəllifləri 40-dan çox ölkədir. Qətnamə Qırğızıstan, Tacikistan və Özbəkistan tərəfindən təqdim edilib.
Sənədin əsas məqsədi region dövlətlərinin tarixi nailiyyətini beynəlxalq ictimaiyyətlə bölüşməkdir.
Qətnamədə sadə və universal bir prinsip təklif olunur: ölkələr sərhəd mübahisələri ilə üzləşdikdə, irəliləyiş yolu sülh, qanun və dialoqa əsaslanmalıdır.
Bəyanatda deyilir ki, qətnamədə qeyd olunan Mərkəzi Asiya ölkələrinin nailiyyətləri bütün beynəlxalq ictimaiyyət üçün konstruktiv nümunə, mehriban qonşuluq münasibətlərinin modeli və region dövlətlərinin beynəlxalq sülhün və təhlükəsizliyin möhkəmləndirilməsinə töhfəsi olacaq.
Xarici İşlər Nazirliyi əlavə edir ki, qətnamənin qəbul edilməsi Qırğızıstan Respublikasının və region ölkələrinin onilliklərdir həll olunmamış aktual məsələləri sülh yolu ilə həll etmək qabiliyyətinin daha bir təsdiqi və tanınmasıdır.
