ABŞ Milli Kəşfiyyatının direktoru postundan istefa verəcəyini açıqlayan Tulsi Qabbardın Mərkəzi Kəşfiyyat İdarəsi (MKİ) ilə pərdəarxası qarşıdurma yaşadığı məlum olub.
Bu barədə "Axios" portalı məlumat yayıb.
Məlumata görə, Qabbardın rəhbərlik etdiyi Milli Kəşfiyyat Direktoru Aparatı bir neçə ay ərzində MKİ ilə gizli qarşıdurma şəraitində olub və bu vəziyyət Senatın daxili təhlükəsizlik və dövlət islahatları komitəsində keçirilən dinləmələr zamanı açıq müstəviyə çıxıb.
“The Washington Post” isə yazır ki, Donald Trampın hazırkı prezidentlik dövründə MKİ ilə Milli Kəşfiyyat Direktoru Aparatı arasında ciddi gərginlik müşahidə olunur və Qabbardın istefası MKİ direktoru Con Retkliffin mövqelərini gücləndirə bilər.
Mayın 13-də Senat komitəsində çıxış edən MKİ əməkdaşı Ceyms Erdman bildirib ki, o, Qabbardın yaratdığı “Director's Initiative Group” (DIG) adlı işçi qrupunda bir il fəaliyyət göstərib. Qrup səs-küylü işlərin araşdırılması, sənədlərin açıqlanması və administrasiyanın siyasətinə qarşı mümkün sabotaj cəhdlərinin müəyyənləşdirilməsi ilə məşğul olub.
Erdmanın yazılı ifadəsində qeyd olunub ki, MKİ DIG qrupunun fəaliyyətinə qanuni nəzarətə mane olub və qrup üzvlərinə qarşı əsassız araşdırmalar başladaraq təzyiq göstərib.
Onun sözlərinə görə, MKİ həm işçi qrupundan, həm də Tulsi Qabbarddan sənəd və məlumatları gizlədib, onlara çıxışı məhdudlaşdırıb.
Bundan əlavə, Erdman bildirib ki, MKİ DIG üzvlərinin kommunikasiyalarını və kompüter fəaliyyətini izləyib.
