ain.az, Bizimyol portalından verilən məlumatlara əsaslanaraq xəbər verir.
İran Silahlı Qüvvələri ABŞ ilə münaqişədə elan olunmuş atəşkəs müddətində öz hərbi potensialını bərpa edib.
Bizimyol.info xəbər verir ki, bu barədə İran parlamentinin sədri Məhəmməd Baqir Qalibaf Tehranda səfərdə olan Pakistan ordusunun komandanı, feldmarşal Asim Munirlə görüşdə bildirib.
Qalibaf qeyd edib ki, İran Silahlı Qüvvələri atəşkəs dövründə elə şəkildə güclənib və yenidən təşkilatlanıb ki, əgər müharibə yenidən başlayarsa, bunun ABŞ üçün nəticələri daha dağıdıcı olacaq.
İran rəsmisi çıxışında ölkəsinin müdafiə imkanlarının əhəmiyyətli dərəcədə artırıldığını vurğulayıb. Bununla yanaşı, o, regionda təhlükəsizlik və sabitliyin qorunmasının vacibliyinə də diqqət çəkib.
Pakistan ordusunun komandanı Asim Munir Tehrana cümə günü axşam saatlarında İran və ABŞ arasında vasitəçilik missiyası çərçivəsində gəlib. İranın IRNA agentliyi bildirib ki, İslamabadın səyləri tərəflər arasındakı mövcud fikir ayrılıqlarını aradan qaldırmağa yönəlib.
Bununla belə, İran mediası qeyd edir ki, feldmarşal Munirin səfəri hələlik Tehran və Vaşinqton arasında ilkin şərtlər əsasında hər hansı razılığın əldə olunması anlamına gəlmir.
Qeyd edək ki, son dövrdə İran və ABŞ arasında münasibətlər nüvə proqramı, regional təhlükəsizlik və qarşılıqlı ittihamlar fonunda gərgin olaraq qalır. Pakistan isə bölgədə diplomatik balansın qorunması məqsədilə tərəflər arasında dialoqu təşviq etməyə çalışır.
Bizimyol.info
Daha ətraflı məlumat və yeniliklər üçün ain.az saytını izləyin.
