Mayın 28-də saat 12:00-da Sea Breeze Marina Yaxt Klubu yay mövsümünün açılışını xüsusi proqramla qeyd edəcək. Qonaqları yarmarka, uşaqlar və böyüklər üçün pulsuz seminarlar, əyləncə proqramları, canlı musiqi, idman fəaliyyətləri və yeni su idman növlərinin təqdimatı gözləyir. Tədbirə giriş bütün qonaqlar üçün ödənişsizdir. Seminarlarda iştirak etmək üçün isə əvvəlcədən qeydiyyat tələb olunur.
Hafta.az xəbər verir ki, tədbir çərçivəsində dənizkənarı aktiv istirahət, idman və ailəvi əyləncə bir araya gətiriləcək.
Proqramın əsas hadisələrindən biri SB20 Reqatası olacaq. Yarışda səkkiz yelkənli qayıq iştirak edəcək, hakim gəmiləri isə yarış prosesini müşahidə edəcək. Qonaqlar yaxt klubunun xüsusi atmosferini hiss etmək, əsl dəniz yarışını izləmək və bayram əhvali-ruhiyyəsində dəniz kənarında unudulmaz gün keçirmək imkanı əldə edəcəklər.
Sea Breeze Marina həmçinin yeni su idmanı istiqamətlərini təqdim edəcək. Buraya 8–16 yaşlı uşaqlar üçün yelkənli qayıq məktəbi, dalğıc mərkəzi, sörf mərkəzi və kayak kursları daxildir. Qonaqlar və sakinlər hər bir istiqamət haqqında ətraflı məlumat ala, həmçinin Portuqaliya və digər ölkələrdən dəvət olunmuş peşəkar təlimatçıların rəhbərliyi ilə keçiriləcək pulsuz yelkənli qayıq və kayak seminarlarında iştirak edə biləcəklər.
3–13 yaşlı uşaqlar üçün ayrıca yaradıcılıq zonası təşkil olunacaq. Saat 12:00-dan 15:00-dək keramika qayıqlarının rənglənməsi, 15:00-dan 18:00-dək isə rəsm məşğələləri keçiriləcək. İştirakçılar hazırladıqları işləri özləri ilə evə apara biləcəklər.
Proqrama həmçinin Crocus Fitness tərəfindən təşkil olunan velosiped marafonu da daxildir. İştirakçılar saat 13:00 və 14:30-da keçiriləcək, hər biri 45 dəqiqə davam edən qrup məşqlərində iştirak edə biləcəklər. Qeydiyyat Crocus Fitness vasitəsilə aparılır.
Sea Breeze Marina Sea Breeze kurort şəhərciyində yerləşən Azərbaycanın ilk özəl yaxt klubudur. Marina 60-dan çox yaxtanı qəbul etmək imkanına malikdir və mənzərəli Marina Village məhəlləsinin bir hissəsini təşkil edir. Ərazidə həmçinin gəzinti zolağı, yaşıllıq sahələri, food court və alış-veriş xiyabanı fəaliyyət göstərəcək.
