Stokholm Beynəlxalq Sülh Araşdırmaları İnstitutunun (SIPRI) yeni hesabatına görə, 2025-ci ilin sonuna qədər sülhməramlı əməliyyatlarda iştirak edən personalın sayı ən azı son 25 ilin ən aşağı səviyyəsinə enib. Təşkilatda hesab edirlər ki, buna “geosiyasi gərginlik, siyasi təzyiqlər və maliyyə böhranı” səbəb olur.
2025-ci il dekabrın 31-nə olan məlumata əsasən, sülhməramlı əməliyyatlarda 78,6 min xarici mütəxəssis iştirak edib. Bu, 2016-cı illə müqayisədə 49% azdır və 2000-ci ildən bəri ən aşağı göstəricidir. Personalın sayı on il ərzində davamlı azalsa da, 2025-ci ildə ən kəskin illik azalma qeydə alınıb — 17%.
2025-ci ildə dünyanın 34 ölkəsində 58 sülhməramlı əməliyyat həyata keçirilib ki, bu da əvvəlki illə müqayisədə üç əməliyyat azdır. Personalın 73%-i cəmi beş missiyada cəmləşib, onlardan dördü Saxaradan cənubdakı Afrika ölkələrində keçirilib. 2025-ci ilin iyulunda BMT-nin sülhməramlı əməliyyatları 2 milyard dollar və ya 2024–2025-ci illər üçün nəzərdə tutulan 5,6 milyard dollarlıq ümumi büdcənin 35%-dən çoxu həcmində maliyyə çatışmazlığı ilə üzləşib.
