"Ədalətli müharibə" konsepsiyasını tənqid edən Roma Papası XIV Leo onu köhnəlmiş adlandırıb və bəşəriyyətin "güc mədəniyyətinə yuvarlandığı" barədə xəbərdarlıq edib.
"Report" "Reuters"ə istinadən xəbər verir ki, bu barədə o, öz ensiklikasında (Roma Papasının siyasət, din, əxlaq və s. məsələlərinə aid bütün katoliklərə müraciəti- red) yazıb.
"Bu gün hər zamankından daha çox, bu sözün ən ciddi mənasında özünümüdafiə hüququna xələl gətirmədən, istənilən hərbi əməliyyatlara haqq qazandırmaq üçün tez-tez istifadə edilən "ədalətli müharibə" nəzəriyyəsinin köhnəldiyini təsdiqləmək vacibdir", - sənəddə bildirilib.
Pontifik həmçinin süni intellektin sərt beynəlxalq tənzimlənməsinə çağırıb və bildirib ki, o dezinformasiyanın yayılmasına səbəb olur və dünyanı sonsuz münaqişələrə sürükləyə bilər.
Papa rəqəmsal inqilabın müharibələrin xarakterini kiberhücumlardan tutmuş hərbi qərarların avtomatlaşdırılmasına qədər dəyişdiyini vurğulayıb.
"Süni sistemlərə ölümcül və ya geridönüşü olmayan qərarlar qəbul etmək hüququnun verilməsi yolverilməzdir", - o qeyd edib.
XIV Leo həmçinin texnoloji hakimiyyətin özəl korporasiyaların əlində cəmləşməsinin təhlükəsi barədə xəbərdarlıq edib və bildirib ki, "həqiqətə biganəlik yavaş-yavaş, lakin qaçılmaz şəkildə totalitarizmə yuvarlanmağa aparır".
"Cebheinfo.az"
