Əmək və Əhalinin Sosial Müdafiəsi Nazirliyi tərəfindən 2023-cü ildən bu günədək 78 uşaq himayədar ailələrə verilib.
Bu barədə Pravda.az-ın sorğusuna cavab olaraq Nazirlikdən bildirilib.
Qeyd olunub ki, həmin uşaqlardan 41-i hazırda Bakı şəhərində, 4-ü Abşeronda, 33-ü isə rayonlardakı (Ağcabədidə 1, Astarada 1, Biləsuvarda 1, Cəlilabadda 1, Gəncədə 4, Göyçayda 1, Göygöldə 3, Xaçmazda 3, Lənkəranda 4, Şamaxıda 1, Şəkidə 1, Şəmkirdə 4, Zaqatalada 1, Oğuzda 3, İmişlidə 2, Mingəçevirdə 1, Zərdabda 1 ailə,) ailələrdə yaşayırlar.
Verilən məlumata görə, indiyədək himayədar ailə olmaq üçün ümumilikdə 107 müraciət qeydə alınıb. Onlardan 50-si müsbət qiymətləndirilərək himayədar ailə statusu alıb. Digər müraciətlərin isə qiymətləndirmə prosesi davam edir.
Xatırladaq ki, himayədar ailələrə dövlət tərəfindən dəstək məqsədilə aylıq müavinətlər ödənilir.
Nazirlikdən bildirilib: “Sağlam uşaqlar üzrə 0-6 yaş arası uşağa görə 355 manat, 7-13 yaş arası uşağa görə 375 manat, 14-18 yaş arası uşağa görə isə 395 manat məbləğində aylıq müavinət verilir. Əlilliyi olan uşaqlar üçün isə bu məbləğlər yaş qruplarına uyğun olaraq müvafiq şəkildə 500, 600 və 650 manat təşkil edir. Bundan əlavə, himayədar ailəyə verilmiş uşaqlar üçün mövsümi geyim alınmasına görə hər rübdə bir dəfə olmaqla 200 manat məbləğində əlavə müavinət ödənilir. Bu müavinətlərin təyinatı proaktiv mexanizm üzərindən elektron qaydada aparılır”.
Qeyd edək ki, ölkəmizdə 2023-cü ildən tətbiq olunan “Himayədar ailə” qayğı modeli uşaqların ailə mühitində böyüməsini və cəmiyyətə inteqrasiyasını dəstəkləyən mexanizmlərdən biridir.
Bu sahədə proses Əmək və Əhalinin Sosial Müdafiəsi Nazirliyinin “Valideyn himayəsindən məhrum olmuş uşaqlar, himayədar ailə və övladlığagötürmə” altsistemi vasitəsilə aparılır.
“Himayədar ailə” qayğı modeli uşaqlara qayğının dünyada geniş yayılmış nümunələrindən biridir. Bu model valideynlərini itirmiş, valideyn himayəsindən məhrum olmuş, valideynləri tərəfindən müəssisəyə qoyulmuş uşaqların qısa və ya uzun müddət ərzində dövlət nəzarəti altında ödənişli əsaslarla ailə mühitində böyüməsi və inkişafını nəzərdə tutur.
Bu sahədə görülən tədbirlərin hər biri uşaqların ailə mühitinə uyğunlaşmasına, onların sosial və emosional ehtiyaclarının qarşılanmasına, təhlükəsiz və sabit şəraitdə böyüməsinə istiqamətlənir.
