Deputat Vüqar Bayramov Milli Məclisin plenar iclasında qadınların məşğulluq göstəricilərini açıqlayıb. Rəsmi statistika ölkədə qadın işçilərin daha çox cəmləşdiyi və ən yüksək maaş aldığı sahələri üzə çıxarıb.
Qadınların ən çox çalışdığı üç əsas sektor formalaşıb. Əmək müqaviləsi ilə çalışan 722 min 147 qadından 242 min 801 nəfəri təhsil sahəsində fəaliyyət göstərir. Səhiyyə və sosial xidmətlər sektorunda 116 min 976, ticarət və nəqliyyat vasitələrinin təmiri sahəsində isə 95 min 566 qadın qeydiyyata alınıb.
Maaş göstəricilərinə görə lider sahələr fərqlidir. Qadınların ən yüksək orta aylıq maaşı mədənçıxarma sənayesində qeydə alınıb. Digər gəlirli sahələr də müəyyənləşib.
Mədənçıxarma sənayesi: 2915 manat
Maliyyə və sığorta sektoru: 1813 manat
İnformasiya və rabitə: 1353 manat
Təhsil sektoru: 731 manat
Deputat qadın sahibkarlar üçün Sahibkarlığın İnkişafı Fondunun güzəştli kreditlərində xüsusi kvotaların ayrılmasını təklif edib. O, həmçinin yaşa görə pensiya hesablanarkən qadınların pensiya kapitalına xüsusi əmsalların tətbiq olunmasını və beləliklə, onların pensiya məbləğlərinin artırılmasını irəli sürüb.
Yəni, Azərbaycanda qadınlar kişilərə nisbətən daha az maaş alır, ən çox müəllim və həkim işləyirlər, ən yüksək qazanc isə neft və maliyyə sektorundadır.
Demokrat.az
