Azertag saytından əldə olunan məlumata görə, ain.az məlumat yayır.
Bakı, 28 may, AZƏRTAC
BMT-nin rəqəmlərinə görə, bu ilin yanvar-aprel ayları arasında Ukraynaya Rusiyanın hücumları zamanı 815 mülki şəxs həlak olub, 4174 nəfər yaralanıb. Qeyd olunub ki, ötən ilin analoji dövründə 682 mülki şəxs həlak olmuş və 3453 nəfər yaralanmışdı. Ölüm hallarının böyük əksəriyyəti Ukraynanın nəzarətində olan ərazidə baş verib.
AZƏRTAC xəbər verir ki, BMT-nin insan hüquqları üzrə ali komissarı Folker Türk son zamanlar bir neçə genişmiqyaslı hücumun, o cümlədən 13-14 may tarixlərində Kiyevdə yaşayış binasına endirilən zərbələrin 24 mülki şəxsin ölümünə və onlarla insanın yaralanmasına səbəb olduğunu bildirib. O, həmçinin 21-22 may tarixlərində işğal olunmuş Starobilskdə təhsil kompleksinə Ukraynanın hücumuna toxunub. Rusiya hakimiyyət orqanlarının məlumatına görə, 21 nəfər həlak olub, 44 nəfər yaralanıb. BMT-nin İnsan Hüquqları Komissarlığı ictimaiyyətə açıqlanan məlumatların qurbanlar arasında tələbələr də daxil olmaqla mülki şəxslərin olduğunu göstərdiyini bildirib.
“Beynəlxalq humanitar hüquq münaqişə tərəflərindən mülki şəxslərə zərər vurmamaq üçün bütün mümkün tədbirləri görmələrini tələb edir. Bunlar sadəcə təklif və ya tövsiyə deyil, iştirak edənlər üçün hüquqi məsuliyyət daşıyan məcburi öhdəliklərdir”, - deyə Türk bildirib.
Ali komissar daha sonra qeyd edib: “Sanki bütün bu itki rəqəmləri öz-özlüyündə kifayət qədər dəhşətli deyilmiş kimi, bu hücumlardan sonra Rusiya rəsmiləri Kiyevdə hücumları artırmaqla açıq şəkildə hədələyiblər”.
BMT-nin insan hüquqları rəhbəri, həmçinin Rusiyanın humanitar heyətə və materiallara qarşı son hücumlarını pisləyib və hər iki tərəfdən mülki şəxslərin ölümü və ya yaralanması ilə bağlı müstəqil araşdırmalar aparılmasına çağırıb. O, həmçinin qeyd edib ki, Ukrayna Silahlı Qüvvələrinin hücumları da Rusiya daxilində mülki şəxslərin ölümünə və yaralanmasına səbəb olub.
“Mən mülki şəxslərin son zamanlar həlak olmasına və yaralanmasına təəssüflənirəm”, - deyə Türk bildirib və hər iki tərəfi "təcili, müstəqil və effektiv araşdırmalar" aparmağa, cavabdeh şəxsləri məsuliyyətə cəlb etməyə çağırıb.
Daha ətraflı məlumat və yeniliklər üçün ain.az saytını izləyin.
