CNBC-nin ekspertlərə istinadən verdiyi məlumata görə, İrandakı müharibədən sonra Hörmüz boğazından keçən neft tankerlərinin hərəkəti heç vaxt müharibədən əvvəlki səviyyəyə qayıtmaya bilər. Qərb gəmi sahibləri döyüş əməliyyatlarının yenidən başlaması və İranla əməkdaşlığın mümkün nəticələrindən ehtiyat edərək bu marşrutdan yayınacaqlar.
Proqnozlara əsasən, daşımaların həcmi müharibədən əvvəlki səviyyənin yalnız 60–70%-nə çata biləcək. Çin gəmiləri sərbəst hərəkət edə bilsə də, Qərb ölkələrinə məxsus gəmilər üçün İranla ayrıca razılaşmalar tələb olunacaq.
RBC Capital Markets şirkətinin qlobal əmtəə strategiyası şöbəsinin rəhbəri Helima Kroft bildirib ki, “Müharibədən əvvəl Hörmüz boğazından keçən neft tankerlərinin hərəkəti, ehtimal ki, tranzitin zirvə nöqtəsi idi”. Onun fikrincə, İranın boğaz üzərində operativ nəzarəti saxladığı istənilən münaqişə sonluğu daşımaların həcminin əhəmiyyətli dərəcədə azalmasına gətirib çıxaracaq.
Lloyd’s List nəşrinin baş redaktoru Riçard Mid isə CNBC-yə bildirib ki, “Bu vəziyyət bəzi apokaliptik ssenarilərdə təsəvvür edildiyi kimi resessiyaya səbəb olmayacaq, lakin müharibədən əvvəlki bərpanı da mümkün etməyəcək”. Onun sözlərinə görə, burada əsas məsələ gəmiçilik azadlığı deyil, siyasi amillərdir və boğaza çıxış da məhz siyasi qərarlarla müəyyən olunur.
