İnsan orqanizminin ən kritik filtrasiya sistemi olan böyrəklərin sağlamlığını qorumaq, bədəndəki zərərli toksinləri (şlakları) və artıq mayeni kənarlaşdırmaq üçün səhər rasionuna daxil edilməli olan ən faydalı içkilərin siyahısı elan edilib.
Musavat.com xəbər verir ki, tanınmış amerikalı dietoloq Keytlin Bil böyrəklərin fəaliyyətini stimullaşdıran, qandakı şəkərin səviyyəsini tənzimləyən və ürəyi qoruyan 7 əvəzedilməz içki variantını açıqlayıb. ABŞ-ın Milli Böyrək Fondunun (National Kidney Foundation) rəsmi hesabatlarına istinadən hazırlanan materialda bildirilir ki, böyrək sağlamlığı üçün siyahının başında təmiz su dayanır.
Su sidiyi duruldaraq böyrək funksiyasını pozan xüsusi hormonları sıfırlayır və diabet riskini aradan qaldırır.
Dietoloqun siyahısında yer alan ikinci içki isə hər kəsin sevdiyi qəhvədir. "American Journal of Kidney Diseases" jurnalında dərc olunan elmi araşdırmalar sübut edir ki, şəkərsiz və siropsuz qəhvə istehlakı xroniki böyrək xəstəlikləri riskini kəskin şəkildə azaldır. Bundan əlavə, tərkibindəki güclü antioksidant və polifenollar sayəsində damarları qoruyan yaşıl çay və kəskin böyrək zədələnmələrinin qarşısını alan qara çay da siyahıda mühüm yer tutur.
Dietoloq həmçinin liflə zəngin olan şəkərsiz smuziləri, böyrək xəstəlikləri riskini 23% azaldan bitki mənşəli zülal mənbəyi – soya südünü və bağırsaq mikrobiomunu tənzimləyərək daxili iltihabın qarşısını alan probiotik zəngini kefiri hər səhər qəbul etməyi şiddətlə tövsiyə edir.
Ekspertlər bu sadə içki vərdişlərinin böyrək çatışmazlığı və dializ təhlükəsindən qorunmaq üçün ən mükəmməl təbii qalxan olduğunu vurğulayırlar.
Musavat.com
