Səhər yuxudan oyanan kimi siqaret çəkmək ürək sağlamlığı üçün ciddi risk yarada bilər. 229 mindən çox insanın məlumatlarının təhlil edildiyi yeni araşdırma göstərib ki, siqaretin yalnız miqdarı deyil, günün hansı vaxtında çəkilməsi də ürək-damar xəstəliklərinin inkişafında mühüm rol oynayır.
VAXT.AZ xarici KİV-ə istinadən xəbər verir ki, tədqiqatın nəticələrinə görə, oyandıqdan sonra ilk beş dəqiqə ərzində siqaret çəkən şəxslərdə gələcəkdə ürək çatışmazlığının inkişaf etmə ehtimalı siqaret çəkməyənlərlə müqayisədə iki dəfədən çox yüksəkdir.
Araşdırma müəllifləri bildirirlər ki, gündə çəkilən siqaretlərin sayından daha çox, ilk siqaretə nə qədər tez əl atılması nikotin asılılığının səviyyəsini və sağlamlıq risklərini göstərən mühüm amildir.
Mütəxəssislərin sözlərinə görə, insan orqanizmi yuxudan oyandıqdan sonra həssas fizioloji mərhələdən keçir. Bu zaman qan təzyiqi yüksəlir, sinir sistemi aktivləşir və iltihab proseslərini stimullaşdıran mexanizmlər işə düşür. Siqaretin təsiri isə bu yükü daha da artırır.
Araşdırmada qeyd olunur ki, ürək çatışmazlığı əksər hallarda illərlə hiss olunmadan inkişaf edir. Bu xəstəlik zamanı ürək orqanizmin ehtiyac duyduğu qanı lazımi səviyyədə dövr etdirə bilmir.
Xəstələrdə adətən daimi yorğunluq, nəfəs darlığı və fiziki fəaliyyət qabiliyyətinin azalması müşahidə olunur.
Həkimlər hesab edirlər ki, risk qrupunda olan şəxslərin erkən müəyyənləşdirilməsi gələcəkdə ağır ürək-damar problemlərinin qarşısının alınmasında mühüm rol oynaya bilər.
Tədqiqatçılar bildirirlər ki, “Oyandıqdan nə qədər sonra ilk siqaretinizi çəkirsiniz?” sualı belə yüksək risk daşıyan şəxslərin müəyyənləşdirilməsi üçün faydalı göstərici ola bilər.
Araşdırma Böyük Britaniyanın genişmiqyaslı tibbi məlumat bazası olan “UK Biobank” sistemində qeydiyyatda olan 229 mindən çox şəxsin məlumatları əsasında hazırlanıb.
Nəticələrə diqqət çəkən qurum isə ürək-damar xəstəliklərinin müalicəsi üçün tibbi texnologiyalar hazırlayan CVRx şirkəti olub.
