Bu il Bakıda qış mövsümünün gözlənilən sərt soyuqları və qar yağıntısı müşahidə olunmadı. Əvəzində yaz aylarında qeyri-sabit və bəzən də qeyri-adi hava dəyişiklikləri diqqət çəkdi. Temperaturun tez-tez dəyişməsi və yağıntıların qeyri-bərabər paylanması sakinlər arasında müxtəlif müzakirələrə səbəb oldu. İndi isə əsas sual yay fəslinin necə keçəcəyi ilə bağlıdır, xüsusilə də havanın daha isti və quraq olub olmayacağı maraq doğurur.
Bakıvaxtı.az bildirir ki, mövzu ilə bağlı ekoloq Qorxmaz İbrahimli Demokrat.az-a bildirib ki, bu il Bakıya görmək istədiyimiz səviyyədə qar müşahidə olunmayıb:
"Son illərdə olduğu kimi, bu il də qarın az olduğu dövrlərdən biri kimi yadda qaldı. Bakı üçün qar hər zaman xarakterik hava hadisəsi deyil, çünki şəhər yarımsəhra iqlim zonasına daxil olan böyük yaşayış məntəqəsidir. Buna baxmayaraq, qış aylarında bəzən Sibir mənşəli soyuq hava kütlələri ölkəyə daxil olduqda qar müşahidə edilir. Lakin Bakı küləkli şəhər olduğuna görə bu yağıntılar çox vaxt davamlı və uzunmüddətli olmur".
Ekoloq deyib ki, bahar mövsümü isə bu il ümumilikdə yağıntılı keçdi:
"İyunun 20-dən sonra yay başlayır və görünən odur ki, iyun ayı sərin keçir. Havanın tədricən isinməsi gözlənilir. İyun ayının sonuna qədər istiləşmə davam edərsə, iyul və avqust aylarının da isti keçəcəyi ehtimal olunur.
Bu il Bakı xüsusilə küləkli keçib. Amma ölkə üzrə ümumilikdə normal yay gözləyirəm. Bakı havası ilə ölkənin ümumi hava şəraitini eyniləşdirmək düzgün deyil və bunu dəqiq proqnozlaşdırmaq da çətindir.
Ümumilikdə, normal yay keçəcək.
İyun və iyul aylarından etibarən quraqlıq dövrü başlayır. İyul daha çox quraq keçəcək. İyul və avqust ayları əsasən quraqlıqla xarakterizə olunacaq. Sentyabr ayında isə məhsul yığım mövsümü başlayır.
Birləşmiş Millətlər Təşkilatının dünən və ya bir neçə gün əvvəl yaydığı məlumata görə, qarşıdakı yay dövrü çox quraq keçəcək və son beş il dünya üzrə daha isti və quraq olacaq. Bu, bir qədər şişirdilmiş proqnoz kimi görünür. Amma havanın istiləşməsi doğrudur və qlobal istiləşmənin təsirləri hiss olunur. Lakin bu vəziyyət faciəvi deyil. İnsanlar narahat olmamalı, gündəlik həyatlarını normal şəkildə davam etdirməlidirlər. Sadəcə, təbiətə qarşı daha diqqətli və həssas olmaq lazımdır.
Ümumilikdə isə, bu ilki yağıntılar gələcək mövsümlərdə də təbiət balansının qorunacağına ümid yaradır",- deyə o, qeyd edib.
