Son illərdə dünyanın müxtəlif ölkələrində denge qızdırmasına yoluxma halları artmaqdadır.
Ölkə.az-ın xəbərinə görə, mütəxəssislər bildirirlər ki, xəstəliyə səbəb olan denge virusu əsasən ağcaqanadlar vasitəsilə yayılır və bəzi hallarda ciddi fəsadlara yol aça bilər.
Denge virusu insanlara əsasən Aedes növünə aid ağcaqanadların dişləməsi nəticəsində keçir. Xəstəlik daha çox tropik və subtropik bölgələrdə yayılır. Virus insandan insana birbaşa təmas yolu ilə ötürülmür.
Həkimlərin sözlərinə görə, yoluxmadan sonra yüksək hərarət, güclü baş ağrısı, gözlərin arxasında ağrı, əzələ və oynaq ağrıları, ürəkbulanma, qusma və dəri səpkiləri kimi əlamətlər müşahidə oluna bilər. Əksər hallarda xəstələr bir neçə həftə ərzində sağalsa da, bəzi insanlarda xəstəlik ağır formaya keçərək daxili qanaxmalara və digər təhlükəli fəsadlara səbəb ola bilər.
Mütəxəssislər qeyd edirlər ki, hazırda denge virusuna qarşı xüsusi antiviral müalicə mövcud deyil. Müalicə əsasən simptomların yüngülləşdirilməsinə yönəlir. Buna görə də xəstəlikdən qorunmağın ən effektiv yolu ağcaqanad dişləmələrinin qarşısını almaqdır.
Mütəxəssislərin fikrincə, iqlim dəyişiklikləri və beynəlxalq səyahətlərin artması səbəbindən denge virusunun yeni bölgələrdə yayılma riski də yüksəlir.
Qeyd edək ki, Gürcüstanda denge virusuna yoluxma halı qeydə alınıb.
Həmidə İbrahimova
