Atəşkəs üzrə məsləhətləşmələr Vaşinqtonda ABŞ Dövlət Departamentinin binasında keçirilir...
İsrail və Livan nümayəndə heyətləri arasında atəşkəs məsələsinə dair danışıqların dördüncü raundu Vaşinqtonda başlayıb.
Poliqon xəbər verir ki, bu barədə İsrailin Vaşinqtondakı səfirliyi məlumat yayıb.
Yerli Ynet portalının məlumatına görə, tərəflər ABŞ paytaxtında atəşkəs mexanizmləri və təhlükəsizlik məsələlərini müzakirə etmək üçün növbəti məsləhətləşmələrə start veriblər.
Məlumata əsasən, görüşlər ABŞ Dövlət Departamentinin binasında keçirilir. Danışıqlarda İsrail və Livan nümayəndələrinin regiondakı gərginliyin azaldılması və atəşkəs rejiminin davamlılığının təmin olunması ilə bağlı məsələləri müzakirə etdiyi bildirilir.
Qeyd olunur ki, tərəflər arasında əvvəlki raundlarda sərhəd təhlükəsizliyi, hərbi fəaliyyətin məhdudlaşdırılması və mümkün eskalasiyanın qarşısının alınması ilə bağlı mövzular gündəmdə olub. Bununla belə, dördüncü raund üzrə detallı gündəm hələlik açıqlanmayıb.
Ekspertlər hesab edirlər ki, ABŞ vasitəçiliyi ilə keçirilən bu təmaslar Yaxın Şərqdə təhlükəsizlik vəziyyətinin sabitləşdirilməsi və İsrail–Livan xəttində mümkün yeni qarşıdurmaların qarşısının alınması baxımından mühüm əhəmiyyət daşıyır.
Poliqon.info
