Ümumdünya Meteorologiya Təşkilatı qlobal istiləşmə və hava ekstremalları ilə bağlı xəbərdarlıq edib...
Poliqon xəbər verir ki, Birləşmiş Millətlər Təşkilatının Ümumdünya Meteorologiya Təşkilatı (ÜMT) El-Ninyo təbii iqlim hadisəsinin yaxın aylarda orta və ya güclü səviyyədə formalaşa biləcəyi barədə xəbərdarlıq edib. Bildirilir ki, bu proses qlobal temperaturun artmasına və ekstremal hava hadisələrinin daha da intensivləşməsinə səbəb ola bilər.
El-Ninyo Sakit okeanın mərkəzi və şərq hissəsində dəniz səthinin vaxtaşırı isinməsi ilə müşahidə olunan iqlim fenomenidir və adətən 9–12 ay davam edir. Təşkilatın məlumatına görə, hazırda okean sularının istiləşməsi bu hadisənin inkişafını dəstəkləyir.
ÜMT-nin proqnozuna əsasən, 2026-cı ilin yay aylarında dünyanın əksər bölgələrində temperatur normadan yüksək ola bilər və El-Ninyo hadisəsinin noyabr ayına qədər davam etməsi ehtimal edilir.
“Biz potensial olaraq güclü El-Ninyo hadisəsinə hazır olmalıyıq. Bu, quraqlıqları və güclü yağıntıları gücləndirə, həm quruda, həm də okeanlarda istilik dalğaları riskini artıra bilər”, deyə ÜMT-nin baş katibi Selest Saulo bildirib.
Məlumata görə, El-Ninyo iqlim sistemlərini qlobal səviyyədə pozaraq müxtəlif regionlarda kəskin fərqli hava şəraiti yaradır. Cənubi Amerikanın və ABŞ-nin bəzi hissələrində yağıntıların artmasına səbəb olduğu halda, Avstraliya, Mərkəzi Amerika, İndoneziya və Cənubi Asiyanın bəzi bölgələrində quraqlıq riskini yüksəldir.
Bundan əlavə, hadisə Afrikanın buynuzu, Mərkəzi Asiya və digər regionlarda da hava şəraitinə ciddi təsir göstərir, tropik siklonların və qasırğaların formalaşmasına şərait yarada bilər.
ÜMT qeyd edib ki, 2023–2024-cü illərdə müşahidə olunan güclü El-Ninyo 2024-cü ilin tarixdə ən isti il olmasına təsir göstərib.
Təşkilat həmçinin xəbərdarlıq edib ki, iqlim dəyişiklikləri fonunda xəstəliklərin, xüsusilə həşəratlarla yayılan infeksiyaların artması, həmçinin ərzaq və su ehtiyatlarının azalması kimi risklər də güclənə bilər.
Poliqon.info
