ABŞ-nin Puerto-Riko adasındakı San-Xuan şəhərindən Çikaqoya uçan “Frontier Airlines” aviaşirkətinə məxsus təyyarədə sərnişinlər qorxulu anlar yaşayıb.

“BUTA.TV” xəbər verir ki, uçuş zamanı bir sərnişinin təcili çıxış qapısını açmağa cəhd etməsi səbəbindən təyyarə marşrutunu dəyişərək Mayamiyə təcili eniş edib. Federal Aviasiya Administrasiyasının (FAA) məlumatına görə, 3345 nömrəli reysdə baş verən insident zamanı sərnişin qəfil ayağa qalxaraq, təcili çıxış qapısına yönəlib və onu açmağa çalışıb. Hadisə kabində təşvişə səbəb olub.

Saytların hazırlanması xidməti

Şahidlərin sözlərinə görə, vəziyyəti görən kabin heyəti və digər sərnişinlər dərhal müdaxilə edərək, şəxsi zərərsizləşdirməyə çalışıblar. Sosial şəbəkələrdə yayılan görüntülərdə insanların “Qapını açmağa çalışır!” deyə qışqırdıqları eşidilir. Müqavimət göstərən sərnişin aviaşirkət əməkdaşları tərəfindən fövqəladə hallar üçün nəzərdə tutulan plastik qandallarla nəzarət altına alınıb. Təyyarə heyəti vəziyyətin daha da gərginləşməsinin qarşısını almaq üçün təhlükəsizlik prosedurlarını işə salıb. Uçuş zamanı yaranan təhlükəsizlik riski səbəbindən ekipaj təcili qərar qəbul edərək təyyarəni planlaşdırılmış marşrutdan yayındırıb. Təyyarə gecə saatlarında Mayami beynəlxalq hava limanına təhlükəsiz eniş edib. Hava limanında federal təhlükəsizlik əməkdaşları və hüquq-mühafizə orqanlarının nümayəndələri təyyarəyə daxil olaraq həmin şəxsi saxlayıblar. Hadisə ilə bağlı araşdırma başladılıb. İlkin məlumata görə, insident zamanı sərnişinlər və ekipaj üzvləri arasında xəsarət alan olmayıb. ABŞ aviasiya rəsmiləri hadisənin səbəblərini araşdırır.