Yaroslavl vilayətində məhkəmə casusluqda, Rusiyanın təhlükəsizliyinə qarşı fəaliyyətlərə kömək etməkdə və dəmir yolu infrastrukturu obyektinə terror hücumu hazırlamaqda ittiham olunan Ukrayna vətəndaşına hökm oxuyub. Bu barədə 2 iyunda regional FSB idarəsi məlumat verib.
Agentliyin məlumatına görə, məhkum edilmiş qadın 1967-ci il təvəllüdlü Tatyana Lonskayadır. İstintaq müəyyən edib ki, qadın könüllü olaraq Telegram messenceri vasitəsilə Ukrayna xüsusi xidmət orqanlarının nümayəndəsi ilə əlaqə saxlayıb.
Qeyd olunur ki, rəhbərinin göstərişi ilə ukraynalı qadın Yaroslavl bölgəsindəki dəmir yolu obyekti haqqında məlumat toplayıb və ötürüb. Müstəntiqlərin fikrincə, bu məlumatlar terror hücumu hazırlamaq üçün istifadə edilə bilərdi.
RİA Novosti xəbər verir ki, "Rusiyanın Yaroslavl vilayəti üzrə FSB İdarəsi casusluqla məşğul olan, düşmənə Rusiya Federasiyasının təhlükəsizliyinə qarşı yönəlmiş fəaliyyətlərdə kömək edən və terror aktı hazırlayan 1967-ci il təvəllüdlü Ukrayna vətəndaşı T. T. Lonskayanın fəaliyyətini dayandırıb".
2-ci Qərb Dairə Hərbi Məhkəməsi Lonskayanı ittihamlarda təqsirli bilib. Məhkəmə onu 17 il həbs cəzasına məhkum edib.
27 mayda FSB-nin İctimaiyyətlə Əlaqələr Mərkəzi Ryazan bölgəsində Rusiya Müdafiə Nazirliyinin obyektləri haqqında məlumatları Ukrayna hərbi kəşfiyyatına ötürməkdə şübhəli bilinən bir şəxsin saxlanıldığını bildirib. Agentliyin məlumatına görə, həmin şəxs Telegram mesajlaşma tətbiqi vasitəsilə könüllü olaraq Ukrayna kəşfiyyat rəsmisi ilə əlaqə saxlayıb.
Əziz Mustafa
