ABŞ-ın keçmiş energetika naziri Ernest Moniz Donald Trampın nüvə sınaqlarının bərpasına dair göstərişini “xüsusilə problemli” adlandırıb. Onun sözlərinə görə, bu qərar Vaşinqtonun Moskva və Pekinlə münasibətlərindəki gərginliyin artdığı bir dövrdə təhlükəli addımdır.
“Trampın qərarı həm müttəfiqlər, həm də rəqiblər arasında çaşqınlıq yaradıb. Bu, xüsusilə nüvə silahına malik dövlətlər üçün təhlükəlidir, çünki onlar artıq mümkün cavab addımlarını nəzərdən keçirməyə başlayıblar. Belə qeyri-müəyyənlik istənilən şəraitdə risklidir, lakin ABŞ, Rusiya və Çin arasında münasibətlərin gərgin olduğu bir vaxtda daha da təhlükəlidir”, – deyə Moniz bəyan edib.
O vurğulayıb ki, ABŞ-ın milli təhlükəsizliyi üçün nüvə sınaqlarının keçirilməsinə ehtiyac yoxdur: “Bu, məntiqsiz addımdır, çünki rəqibləri də eyni addımı atmağa sövq edəcək. Bundan əlavə, sınaq poliqonlarının yaxınlığında yaşayan insanlar bu qərarı mənfi qarşılayacaq.”
Keçmiş nazir xatırladıb ki, 1996-cı ildən bəri ABŞ hökumətinin mütəxəssisləri nüvə sınaqlarının texniki və elmi baxımdan zəruri olmadığını dəfələrlə təsdiqləyiblər. Onun sözlərinə görə, digər ölkələr sınaq moratoriumundan imtina etsələr, elmi-texniki cəhətdən daha çox qazanc əldə edəcəklər.
Monizin sözlərinə görə, ABŞ 1945-ci ildən bəri 1 030 nüvə sınağı həyata keçirib, halbuki dünyada ümumilikdə 2 056 belə sınaq baş verib.
