Yeni qanun ordu, polis və xalq özünümüdafiə qüvvələrini vahid komandanlıq altında birləşdirəcək...
Poliqon xəbər verir ki, Venesuela prezidenti Nikolas Madura ölkənin kompleks müdafiə komandanlığının yaradılması barədə qanunu imzalayıb. Bu təşəbbüs daha əvvəl Milli Assambleya tərəfindən təsdiqlənmişdi. Dövlət televiziyası Venezolana de Television kanalında çıxış edən Madura bildirib ki, yeni qanun silahlı qüvvələr, hüquq-mühafizə orqanları və xalq özünümüdafiə dəstələrinin fəaliyyətini vahid komandanlıq altında birləşdirəcək.
Madura vurğulayıb ki, bu təşəbbüs “tarixi doktrinanı özündə birləşdirir” və “millətin müdafiəsinə dair birgə məsuliyyət” prinsipini təsbit edir. Onun sözlərinə görə, sistem “ordu, polis və xalqın birliyi” əsasında fəaliyyət göstərəcək.
Yeni qanun dövlət, regional və bələdiyyə səviyyələrində müdafiə strukturlarının formalaşdırılmasını nəzərdə tutur. Xarici təcavüz halında Venesuelanın müdafiəsi təkcə ordunun silahlı müqaviməti ilə deyil, həm də xalqın partizan tipli mübarizə mexanizmləri ilə təmin ediləcək.
Eyni zamanda, Madura ölkə daxilində aparılan bu islahatlarla yanaşı beynəlxalq dəstəyə də ümid edir. ABŞ tərəfindən artan hərbi təzyiq fonunda o, Rusiya, Çin və İran hökumətlərindən yardım istəmişdi. Amerika mediasının məlumatına görə, bu yardım hərbi-texniki əməkdaşlığın genişləndirilməsi və müdafiə sistemlərinin modernləşdirilməsi istiqamətində ola bilər.
Poliqon.info
