ABŞ Qərb yarımkürəsində narko-terrorçulara qarşı yeni hərbi əməliyyat elan edib.
Musavat.com xarici mediaya istinadla xəbər verir ki, ABŞ-nin müdafiə naziri Pit Heqset ABŞ-yə narkotik tədarük edən narkotik kartellərini hədəf alan "Cənub nizəsi" əməliyyatının başlandığını elan edib.
Missiyaya ABŞ Cənub Komandanlığı və eyni adlı birgə operativ qüvvələr birliyi cavabdehdir. Əməliyyatın məqsədi narkotik qaçaqmalçılarının yaratdığı təhlükəni aradan qaldırmaq və Amerika xalqını qorumaqdır.
"Qərb yarımkürəsi Amerikanın vətənidir və biz onu müdafiə edəcəyik", - Heqset açıqlamasında yazıb. ABŞ ordusu əvvəllər Karib dənizində gəmilərə hücum edən şübhəli narkotik qaçaqmalçılarına qarşı tədbirlər görüb. Lakin medianın məlumatına görə, indi Venesuela ərazisinə mümkün zərbələr də daxil olmaqla daha geniş tədbirlər müzakirə olunur.
Pentaqon sözçüsü bildirib ki, bazar ertəsi narkotik daşıdığı güman edilən gəmiyə zərbə endirilib və bu, iyirminci belə aktdır. Hücum nəticəsində ABŞ-nin narkotik ticarəti ilə məşğul olduğuna inandığı dörd nəfər həlak olub. Rəsmi olaraq, narkotik kartellərinə qarşı hərbi güc tətbiqinə başlandığından bəri ən azı 80 nəfər öldürülüb.
Musavat.com
