KOAH — Xronik Obstruktiv Ağciyər Xəstəliyi — dünyada milyonlarla insanın həyat keyfiyyətini aşağı salan ciddi tənəffüs problemi olaraq qalır.
Ekologiya.az-ın xəbərinə görə, araşdırmalar göstərir ki, xəstələrin böyük əksəriyyətində, təxminən 80 faizində, əsas risk amili siqaret çəkməkdir. Bununla yanaşı, zəif qidalanma, havanın çirkliliyi və zərərli mühit faktorları da xəstəliyin inkişafını sürətləndirən ən önəmli səbəblər arasında yer alır.
Bu xəstəliklə bağlı statistika, qlobal miqyasda narahatedici mənzərəni bir daha ortaya qoyur. KOAH hər il dünyada təxminən 3 milyon insanın ölümünə yol açır və xüsusilə siqaret istifadəsinin yüksək olduğu regionlarda ən ağır ictimai sağlamlıq problemlərindən biri kimi qiymətləndirilir.
Əldə olunan məlumatlara görə, 40 yaşdan yuxarı insanların təxminən 10 faizində KOAH əlamətləri mövcuddur. Bununla belə, daha narahatedici fakt odur ki, xəstələrin təqribən 85 faizi hələ də diaqnoz almayıb və xəstəlik gizli formada irəliləməyə davam edir. Bu vəziyyət müalicə imkanlarını gecikdirir və ölüm hallarının artmasına səbəb olur.
